12 ka tawo nadakpan sa dakbyan sa Danao
CEBU, Philippines – Dose ka tawo nga gikatahapang drug pushers ug mga gidudahang manuyopay ang nangadakpan sa managlahing anti-illegal drug operations sa kapolisan diha sa Highway Looc ug Barangay Suba sa Dakbayan sa Danao.
Ang mga nadakpan nga mao sila si Silvestre Barriga, 30, Alfred Perez, 30, Ruel Hopia Bughao, 33, Garry Porlas, 25, Selones Rosales, 45, ug Jonathan Pasaul Jr.
Matud pa ni Senior Police Officer 1 Arnold Labine sa Danao City Police Station nasakmit gikan sa mga dinakpan ang 16 ka gagmay nga paketeng shabu, P600 nga ilang gituohang halin ug P200 nga nagsilbing marked money.
Samtang sa laing gipahigayon nga buy bust operation sa Sitio Camansi, Barangay Togonon ug nadakpan sila si Rosito Perez, 40, ug Marjune Canaugay, 26.
Matud ni Labine, nadakpan usab ang giingong “nanuyop” nga sila si Elesio Cinco, 20, Armand Piña, 26, Mark John Quimbo, 23, ug Mark Ernesto Patalingjug,27.
Nasakmit gikan sa maong operasyon ang napulo ka gagmay nga paketeng shabu, P300 nga marked money ug P400 nga gituohan halin sa ilegal nga drugas.
Nadakpan usab sa kapolisan sa Barangay Suba ang 18 anyos nga si Agustin Cambayam tungod sa pagdala og kalibre .38 nga puno sa mga bala.
Ang mga dinakpan kasohan og paglapas sa Republic Act 9165 o Comprehensive Dangerous Drug Act of 2002 ug kalapasan usab sa Republic Act 10591 o ilegal nga paghupot og armas batok kang Cambayam. (/IBM)(BANAT NEWS)
- Latest
