CEBU, Philippines – Wala una gipadayon sa pagtuki sa hunta probinsyal ang kabahin sa pagpasar sa resolusyon nga magtugot kang Gobernador Hilario Davide, III nga mogama og kontrata tali sa contractor nga motukod sa 20-storey resource center.
Kagahapon “gi-lay on the table” ang resolusyon nga maghatag og pagtugot kang Davide nga mogama og kontrata tali sa WT Construction.
Ang mga bokal wala kini magkahiusa sa pagpasar sa nahisgutang resolusyon diin aduna silay mga gipadayag nga concern sa maong proyekto. Atol sa session kagahapon, si Bokal Sun Shimura una kining nipadangat og concern kalabot sa procedure sa proyekto kon nasubay ba sa sanggunian ang proseso.
Gituki ang paghatag og pagtugot kang Davide nga mosulod og kontrata apan ang pag-ratify sa loan sa Kapitolyo alang sa maong proyekto wala pa.
Ang provincial legal officer, Atty. Orvi Ortega ang gipatawag kagahapon sa Provincial Board aron paghatag og katin-awan.
Si Ortega nipasabot nga ang resolusyon nga nagtugot kang Davide nga mosulod og kontrata ug pag-ratify sa utang sa Kapitolyo nga P1.5 bilyones ngadto sa Development Bank of the Philippines (DPB) managlahi. Sa iyang bahin, si Danilo Rodas, provincial budget officer nagkanayon nga ang ratification igo lang sa pag-formalize sanglit adunay monetary board opinion gikan sa Bangko Sentral ng Pilipinas nga nagpasabot walay problema ang tinguha sa Kapitolyo nga mangutang.
Samtang si Bokal Edsel Galeos nisugyot nga i-defer ang resolusyon paghatag og pagtugot sa gobernador hangtud masulbad ang mga concerns niini.
Ang mga concern naglangkub sa economic nga epekto sa edipisyo, historical issue tungod sa concern sa National Historical Commission (NHCP).
Human sa speech ni Galeos, gi-divide ang house diin walo ka bokal ang nipabor sa deferment ug walo usab ang wala mopabor samtang si Bokal Raul Bacaltus ni-abstain.
Hinungdan nga si Bise Gobernador Agnes Magpale ang ni-break sa tie ug nipabor nga di i-defer ang resolusyon.
Sa dihang gipangayo na ang boto kon pabor ba ang mga bokal sa pagpasar sa resolusyon walo ka bokal ang pabor, unom ang dili pabor ug tulo ang ni-abstain. (Le Phyllis F. Antojado/BDB)
Duha giingong durugista sikop
Natanggong sa detention cell sa Lapu-Lapu City Police Office (LLCPO) ang pusher nga babaye ug lalaki nga nadakpan sa managkalahing anti-illegal drug operation sa kapolisan.
Si Police Chief Inspector Jaime Tolentino sa City Intelligence Branch (CIB) sa LLCPO miila sa mga nasikop nga si Joel Barrientos, 44-anyos nagpuyo sa Lot 1, Block 15, Boungainvilla Village sa Barangay Marigondon sa maong dakbayan.
Matud ni Tolentino nga kuyog nila ang mga sakop sa Special Weapons and Tactic, (SWAT) sa LLCPO dihang ilang gi-serve ang warrant of arrest nga giluwatan ni Judge Joseph Stephen Ygnacio sa Branch 67 sa Regional Trial Court (RTC) Branch 7 sa Dakbayan sa Lapu-Lapu.
Si Barrientos giingong nasakmitan og duha ka dagkong putos sa gituohang shabu ug 12 ka gagmay nga putos nga nitimbang tanan ngadto sa 7.86 gramos.
Nadakpan usab sa laing team sa kapolisan sa Presinto 2 sa LLCPO ang giingong pusher nga babaye sa Sitio Abuno sa Barangay Pajac, Dakbayan sa Lapu-Lapu.
Ang nasikop mao si Analyn Ariza Tejano, alyas” En-en”, 35 anyos, nagpuyo sa maong dapit.
Nasakmit gikan ni Tejano ang walo ka gagmay nga paketeng shabu ug ingon man ang P300 nga buy bust money. (/BDB) (BANAT NEWS)