“Kush weeds’ imported?

CEBU, Philippines — Mga nasakmit nga ‘kush weed’ gikan sa beauty queen nga nadakpan  pinaagi sa buy bust operation giingong gikan pa sa gawas sa nasud sanglit walay manubo niini diri sa Pilipinas. Kini ang gipadayag sa tigpamaba sa Philippine Drug Enforcement Agency-7 Leia Albiar-Alcantara sa pakighinabi sa Banat News. “Gikan gyud ni siya sa gawas kay according sa among chemist, walay motubo ani diri sa Philippines tungod sa weather,” sigun ni Alcantara. Tungod kay nihit kini dinhi,  mas mahal ang presyo niini ug giingong mga kwartahan lang  ang tiggamitan niini.

“Mahal ni nga klase, it’s not as rampant as shabu,” dugang sa maong tigpamaba.

Matud ni Alcantara nga magpahigayon sila og intelligence workshop kauban ang kapolisan sa pag-monitor sa posibleng pagsulod niini sa Central Visayas.

Nasayran nga nadakpan sa buy bust operation ang kanhi contestant sa Binibining Cebu 2018 nga si Teri Marina Silva Colmenares, 22, didto sa Barangay Kamputhaw Dakbayan sa Sugbo nidtong Sabado sa kaadlawon.

Sa report sa Guadalupe Police Station napalitan ang maong suspek og duha ka paketeng kush weed atol sa operasyon. Gawas pa niini, laing duha ka mga pakete ug pito ka mga plastik sa gituohan gihapong mga kush weeds ang nasakmit gikan sa iyang posesyon. Unang nadakpan ang usa ka Nicole Allan Pajo Casiño, 24, kinsa nakuhaan og mga lysergic acid diethylamide (LSD) o party drugs nga susama lang og gamay nga papel nga pahilison sa dila.

Gawas sa LSD, may nakuha usab nga pipila ka mga paketeng kush weeds si Casiño. Matud pa sa hepe sa kapolisan sa Guadalupe nga si Senior Inspector Dexter Basirgo, si Colmenares ang tigsupply niini kang Casiño.  Ang hepe sa Cebu City Police Office nga si Senior Supt. Royina Garma nagkanayon nga wala pa nila masubay kun diin gikan ang kush weeds ni Colmenares. “Di na man siya nagsasalita,” si Garma nagkanayon. Matud pa usab ni Garma, gihimakak hinuon ni Colmenares nga paryente sila ni kanhi Bayan Muna Party-list Rep. Neri Colmenares.

“Dini-deny man niya. Di daw niya kilala,” sigun ni Garma. Sa interview sab sa ABS-CBN didto sa kaulohan, gihimakak sab ni Neri nga paryente sila sa maong beauty queen. Sa social media mikuyanap ang mga hungihong nga pagumangkon ni Neri ang maong kanhi kandidata.

Si Teri Marina  ang mirepresentar sa usa ka lungsod sa amihanang Sugbu nakasulod sa top 25 sa Binibining Cebu 2018. (/IBM)(BANATNEWS)