12 mil kapin ka negosyo sirad-an?
CEBU, Philippines – Niabot na sa 12,545 ka business establishments sa Siyudad sa Sugbo ang nasusi sa Task Force on Inspection and Investigation of Business Permit gikan sa buwan sa Agosto hangtod ning buwana.
Gipahibawo sa hepe sa Task Force nga si Melvin Bacalso nga sa 12,545 ka establisemento, adunay 1,185 ang wala gyuy business permit ug wala makabayad og business tax.
Midugang sab kini nga duna sab sila’y natala nga mibayad og buhis apan wala mo-process sa final business permit nga miabot og 2,930. Sagad sa mga establisemento nga nahatagan og show cause order naglangkub sa hotel, restaurant, sari-sari store ug uban pa. Diin kadaghanan niini nahimutang sa urban barangays, downtown ug uptown areas.
“Kung dili sila mo-respond sa show cause within three days, ipa-close gyud ang ilahang establishment”, butyag ni Bacalso.
Giangkon ni Bacalso nga maglisod sila og kuha sa ilang target nga ma-inspect ang 30 mil ngadto na sa 40 mil ka business establishments gumikan nagkuwang sila sa tawo nga mohimo niini. (/DILT)(BANAT NEWS)
- Latest
