Tunga sa milyon nga balor sa shabu nasakmit

CEBU, Philippines — Mokabat ngadto sa P500,000 ang kantidad sa shabu ang nasakmit sa managlahing anti-illegal drug operation sa mga kapolisan sa Mandaue City Police Office (MCPO) ug lungsod sa Liloan diin upat ka mga gidudahang drug pushers ang gidakop.

Si Chief Inspector Hugo Rio Ipong nga maoy hepe sa presinto 4 sa MCPO miila sa mga nadakpan nga sila si John Carlo del Castillo,23, ug  Angel Seguban, 19, nga nag-abang sa usa ka apartment didto sa St. Therese drive sa Barangay Banilad.

Ang tag-iya sa apartment nga gipuy-an sa duha maoy nakamatikod sa ilegal nilang kalihokan nga maoy rasun nga iya dayun kining gitaho ngadto sa kapolisan.

Sa gihimo nilang pagsiksik sa lawak sa duha, ilang nakuha ang shabu ug ingon man ang  digital nga timbangan, salapi ug mga drug paraphernalia nga gisulod sa backpack nga gipanag-iya ni Del Castillo.

Padayun pa ang ilang pagsusi sa supplier og shabu nga maoy gikuhaan sa maong mga dinakpan nga gibalhog na karon sa sulod sa selda sa ilang detention cell.

Sa laing bahin, duha ang nasikop sa kapolisan sa Liloan Police Station sa Sitio San Roque, Barangay Jubay nga maoy hinungdan sa pagkasakmit sa mokabat P100, 000 nga shabu.

Giila ni Senior Police Officer 4 Marcelino Servilla  ang ilang nadakpan nga mao sila si Epefanio Makiling Wagas ug Ricky Yrogyrog Wagas nga pulos nagpuyo sa maong dapit nga maoy hinungdan sa ilang pagkatanggong sulod sa detention cell. - LPM, (BANAT NEWS)