CEBU, Philippines — Gitinguha karon ni Senior Superintendent Lemuel Obon, director sa Lapu-Lapu City Police office, nga mubutang sila og mga 'police assistance desk' sa nagkadaiyang simbahan sa maong syudad alang sa nagsingabot nga pagsugod sa Simbang Gabi o Misa de Gallo.
Giawhag ug gipahimangnoan usab ni Obon ang mga pamilya nga dili mahurot pagpanglakaw og kung mahimo magbilin og usa aron mubantay sa balay. Sa maong paagi malikayan nga mabiktima sa pagpangawat kung ugaling magsugod na ang simbang gabi.
Kun ugaling dili malikayan nga manglakaw ang tanan sa pamilya, mas maayo nga adunay silingan nga pahibal-on aron makapaniid o makabantay kini sa higayun nga adunay kasikas sa maong panimalay nga gibiyaan.
Gitataw ni Obon nga una nila kining pagahimuon sa dili pa magsugod ang misa ug nobenaryo nga gipahaum usab sa adlaw nga kasumaran sa pagkahimugso sa Mahal nga Birhen Maria.
Makigtagbo usab si Obon sa mga security guards sa mga nagkadaiyang malls ug beach resorts sa Lapu-Lapu aron mahatagan kini og dugang pahimangno ug tambag kabahin sa pagbantay sa tagsa-tagsa nila ka mga establisemento. — LPM (BANAT NEWS)