Tulo napusilan patay

CEBU, Philippines – Tulo ka tawo ang patay sa managlahing pagpamusil diin usa kanila nakalas atol sa anti-illegal drug operations sa kapolisan sa Talisay City Police Station human giingong nisukol sa mga polis diha sa Barangay San Roque sa maong dakbayan.

Ang namatay nailhan nga si Eugene Cabando alyas Amaw, nagpuyo sa maong dapit. Si Supt. Marlu Conag, pangu sa kapulisan sa maong dakbayan nagkanayon nga hiniusa nga operasyon kini sa iyang mga sakop ug sa Regional Mobile Force Batallion (RMFB-7) nga nagbase diha sa Barangay Tanke. Sumala pa nga nakabantay si Cabando nga polis ang iyang gikasabot hinungdan nga nibunot kini sa iyang armas dayon og pamusil. Apan ang mga operatiba daling nakatago ug nakabawos sa pagpusil. Wa magdugay nahagba si Cabando ug nakabsan gyud sa iyang kinabuhi.

Ang taga Scene of the Crime Operatives (SOCO) nga nisusi sa crime scene nakakuha og .38 nga revolver nga maoy giingong gigamit sa namatay, tulo ka basiyo sa sud sa tambor niini ug 51 ka gagmay nga pakite sa shabu. Si Conag nitataw nga kauban si Cabando sa napatay niadtong miaging semana nga sila si Alvin ug Dugyot.

Sa laing bahin, patay  ang masyador sa buwangan ug ang  usa ka lalaki nga giingong sakop og fraternity sa managlahing pagpamusil sa Dakbayan sa Mandaue.

Ang masyador gipatay sa sulod sa D & C Coliseum nga kanhi Mandaue Coliseum nga nahimutang sa eskina Sotero Cabahug ug A.C. Cortes Avenue sa Ibabao, Estancia, Dakbayan sa Mandaue.

Si Police Chief  Inspector  Aldrin Villacampa nga maoy hepe sa Presinto 1 sa Mandaue City Police Office (MCPO) miila sa biktima nga mao si  Carlos Soco Reyes, 42, taga Sitio Macupa, Barangay Ibabao sa maong dakbayan.

Matud pa nga diha sa gawas sa ruydahan ang biktima kauban sa naglibot nga mga sugarol  sa manok igtatari sa dihang kalit lang milanog ang boto sa armas nga nakaingon sa pagkatibulaag sa mga tawo ug nag-ilogay sa pagpanggawas sa pultahan.

Ang biktima naigo sa iyang nawong ug nahagba diha sa iyang gibarogan, samtang walay nakakita kun kinsa ang nipusil niini kinsa daling nisagol sa bul-og sa mga tawong naglumbaanay og panagan sa gawas. Gisusi karon sa kapolisan kun may kalambigitan ba sa sugal sa buwangan ang motibo o ang kalambigitan sa ilegal nga drugas tungod kay ang biktima drug surrenderer kaniadto.

Sa laing pagpamusil, nahitabo  kini alas 4  pasado ang takna sa kaadlawon sa eskina Tabok ug Barangay  Basak sa mao gihapon dakbayan nga niresulta sa kamatayon ni Clint Carlos Soco Reyes, 25, taga Hermag Village sa Barangay Basak sa maong dakbayan.

Si Senior Police Officer 2  Allian Corado sa Presinto 1  miingon nga naglakaw lang  ang biktima padulong sa usa ka kan-anan sa dihang kalit kining gipusil sa riding- in-tandem nga nagsunod niini. Wala pa matino sa kapolisan ang motibo sa maong pagpamusil. Apan usa sa gisubay ang kalambigitan sa fraternity sanglit ang biktima sakop niini. - Romeo Limpangog/IBM (BANAT NEWS)