CEBU, Philippines — Ang direktor sa Cebu Provincial Police Office nga si Police Senior Supt. Manuel Javier Abrugena nagkanayon nga dakong purohan nga adunay kalambigitan sa trabaho sa mga kanhi polis nga silang retired SPO1 Edgar Causon ug si retired SPO4 Ferdinand Dindo Navales ang motibo sa pagpatay nilang duha diha sa Dakbayan sa Talisay niadtong Domingo sa gabii. Ang duha parehong nadestino kaniadto sa mga anti-illegal drug units sa Cebu City Police Office ug sa Cebu Provincial Police Office. Ang duha gipamusil patay diha sa Barangay Bulacao, sa Dakbayan sa Talisay niadtong Domingo sa gabii samtang sila nangape sa usa ka mall sa maong barangay.
Matud ni Abrugena nga base sa testimonya sa mga nakasaksi, duha ka paresang riding-in tandem ang mipatay sa duha.
Naigo sa ulo ug ubang parte sa lawas ang mga biktima nga miresulta sa hinanali nilang kamatayon.
Gisusi usab nila ang personal nga motibo apan sa pagkakaron, ang ilang kanhi trabaho maoy gidudahang hinungdan nga sila gipanghipos kay posibleng daghan sila og mga naligsan kaniadto.
Matud pang Abrugena, bisan og retirado na ang ubang polis tighatagan gihapon sila og impormasyon sa kapolisan ilabi na bahin niadtong mga nalambigit sa ilegal nga drugas.
Si Causon nadestino sa City Anti-Illegal Drugs Special Operations Task Group samtang si Navales sa Provincial Anti-Illegal Drugs Special Operations Task Group kaniadto.
Nag-optional retirement niadtong tuig 2017 si Causon samtang nag-optional retirement usab si Navales niadtong Septiyembre 1, 2013.
“We are receiving reports na mga drug personalities na affected sa anti-illegal drugs operations magreretaliate sa kapulisan,” si Abrugena nagkanayon.
Gitun-an nila karon kun magtukod og Special Investigation Task Group sa maong kaso.
Blangko pa ang pamilya sa mga nangamatay nga police human kini sila gipamusil patay atubangan sa usa ka dakong balay patigayon sa may Barangay Bulacao, Dakbayan sa Talisay, Domingo sa gabie diin gikan kini sila nangape.
Ang anak ni Causon nga si Nievo mitug-an sa Banat News nga miadto dayon siya sa crime scene pagkadungog nga napusilan iyang amahan ug nakompirmar niya kini pagkakita niini ug sa motorsiklong gisakyan sa amahan.
Siya midugang nga nadestino usab kaniadto sa Traffic Group sa Talisay ang iyang amahan ug nabalhin sa Pardo Police Station ayha pa niretiro niadtong Nobiyembre sa miaging tuig.
Gitug-an sa anak nga wala siya masayod kung aduna bay hulga sa kinabuhi nga nadawat ang iyang amahan kay dili man kini moestorya kanila.
Gihulagway sa anak nga maayo ang iyang amahan ug buotan apan estrikto pagdumala kanilang mga anak. Ang anak malaumon nga mahatagan og hustisya ang kamatayon sa iyang amahan.
Samtang si Navales, giila usab pinaagi sa iyang asawa kinsa wala masayud kung nganong nasakay kini ngadto kang Causon. (BANAT NEWS)