Manindahay og pabuto patumanon sa rekisitos
CEBU, Philippines – Gipanglantawan nga diyotay ra unya ang mga mamaligya og pabuto alang sa selebrasyon sa pasko ug bag-ong tuig tungod kay sa dili pa makabaligya ang mga manindahay kinahanglan una nila nga mokuha og mga rekisitos.
Si Konsehal Dave Tumulak, chairman sa committee on public order and safety nibutyag nga aduna siyay meeting tali sa firecracker vendors ug iyang gipaabot ang kagustohan sa city government nga kinahanglang nila nga motuman sa mga rekisitos nga gipangayo sa dili pa sila makabaligya.
Ang mga rekisitos gilangkuban sa permit gikan sa Philippine National Police, Bureau of Fire Protection, Department of Trade and Industry ug ang kagamhanan sa siyudad mo-isyu usab og temporary permit.
Ang mga mamaligyaay og pabuto dili usab makabaligya kong ang ilang produkto walay Philippine Standard nga marka ug ang mga pabuto nga walay ngalan sa manufacturer gidili usab kini.
Ang mga manindahay nga makatuman sa safety permits ug measures makasugod sila og tinda sa Disyembre 1 hangtod sa 31.
Adunay mga polis ug kawani sa siyudad ang mosusi aron masiguro nga ang mga pabuto nga gipangbaligya legal ug luwas. Anha gihapon sa South Road Properties ang designated fire cracker zone apan dili na diha sa naandan nga lugar gibalhin na kini sa bakanteng luna tupad sa U-turn slot sa Cebu South Coastal Road(CSCR).
Matud ni Tumulak nga higpit nga gidili ang pagpamaligya og pabuto diha sa sidewalk ug sa mga kabarangayan. -/BDB (BANAT NEWS)
- Latest