Taga Sitio Sandayong sa Buhisan gipabakwit

CEBU, Philippines — Gipatuman kagabii sa kagamhanan sa Siyudad sa Sugbo ug sa Barangay Buhisan ang preemptive evacuation sa dul-an 30 ka pamilya sa Sitio Sandayong.

Kabahin kini sa pagpangandam sa bagyong Samuel nga gipaabot nga mo-landfall karong adlawa diin apektado ang Sugbo.

Alas 6 sa gabii kagahapon, ang kapin 100 ka tawo sa maong sitio ang gipabakwit aron malikayan ang mga disgrasya nga posibleng motumaw.

Matud sa pangulo sa Cebu City Disaster Risk Reduction and Management Office, Nagiel Bañacia, ang Sitio Sandayong naila nga high-risk hinungdan nga gipatuman nila ang preemptive evacuation diin ang mga tawo temporaryo unang gipahiluna sa Barangay Hall.

Asoy ni Bañacia nga ang Buhisan Action Response Team (BART) na maoy mopatuman niini ug suportahan sila sa siyudad pinaagi sa paghatag og bugas ug ubang pagkaon.

“Mao ra man guy nakuanan nato nga naay imminent danger ba. Kato ra gyud ang high risk maoy atong giuna gumikan sa katong reported nga naay liki, katong cracks, mao ra to atong kuan, ang uban on stand-by,” asoy ni Bañacia.

Nasayran nga ang CCDRRMO ingon man ang Barangay Buhisan maoy nirekomendar sa preemptive evacuation sa mga residente sa maong dapit.

Subay niini, si Buhisan Barangay Captain Gremar Barete niasoy nga buntag pa lang kagahapon nag-rekurida na sila ug pagka-hapon gi-activate nila ang ilang disaster plan sa barangay.

“Sandayong gyud ni sila kay mao man gyud atoang main concern kay about sa mga daplin sa sapa kay dili man kay ta kay atong gi-check gahapon ang Buhisan dam wala man mapuno so naa pa tay allowed space nga before siya mapuno kung naa may kusog nga uwan,” matud ni Barete.

Gi-monitor sab nila ang mga nagpuyo daplin sa sapa sanglit kun pananglitan mograbe ang uwan nga moresulta sa pagka-puno sa Buhisan dam ila dayon kining ipa-evacuate aron malikay sila sa peligro.

Bana-bana sa kapitan moabot sila sa 50 ka pamilya. - GMR/(BANAT NEWS)