Gituohang kawatan, gipatay sa Talisay
CEBU, Philippines — Gidudahang kawatan ang gipatay sa wala ilhing nagmotorsiklong mga lalaki sa Barangay Linao, Dakbayan sa Talisay niadtong Sabado sa gabii.
Ang biktima mao si Geogenes Trasmil, 31, nga nagpuyo sa maong dapit. Si PO1 Berdin Bangcaya sa Talisay City Police Station nagkanayon nga nakauna na ang kapulisan sa Minglanilla sa pagresponde sa panghitabo tungod kay boundary man ang lugar nga nahitaboan.
Sa pag-abot sa iyang mga kaubanan base sa gi-turnover nga pakisusi ni SPO1 Charlie Chinel nga nakaestorya sa testigo nga nagdagan ang biktima nga gisundan sa mga mamumuno nga nagsuot og helmet.
Lima ka mga masipang buto sa armas ang ilang nadungog diin ang biktima nakaangkon sa nagkalain-laing samad sa iyang kalawasan. Gitabang ang biktima apan nakabsan gyud kini sa iyang kinabuhi.
Ang mga nirespondeng polis nakarekuber og lima ka empty sa wa matino nga bala, pliers, nail cutter ug pouch.
Nagkanayon si Bangcaya nga daghang estorya sa lugar nga nailhan ang biktima nga hilabtanon hinungdan nga mao kin i ang usa sa ilang gisubay sa motibo sa krimen. Hinuon padayon pa ang ilang imbestigasyon sa laing anggulo sa krimen. (BANAT NEWS)
- Latest
