CEBU, Philippines – Wala nay gitugotan nga laing gasoline station nga tukoron diha sa Cebu South Coastal Road (CSCR) nga habig sa dakbayan sa Talisay.
Kini human napasar na ang ordinansa nga magdili na sa bag-ong gasoline station nga ibutang diha sa maong lugar.
“An ordinance prohibiting the installation of new gasoline station from Lawaan junction to Cebu City boundary”, tipik sa maong ordinansa.
Si Konsehal Rodulfo Cabigas, chairman sa komitiba sa imprastraktura nagkanayon nga makapahadlok sa mga negosyante ang gasoline station sa lugar tungod kay delikado kong adunay sunog diha sa duol.
Iyahang gipasabot nga dili anti-business ang mao nilang ordinansa apan buot lang nilang i-regulate ang mga gasoline station nga hinay-hinay nga nibarog sa lugar.
Sa pagkakaron adunay unom ka gasoline station ang naa na diha sa CSCR habig sa siyudad.
Gawas pa sa pag-agni sa mga negosyante sa pagbubo og puhonan sa Siyudad sa Talisay ilaha usab nga mapatuman ang comprehensive land use plan.
Dugang ni Cabigas nga kon mainteresado na ang mga negosyante sa pagnegosyo sa siyudad makabenepisyo niini ang mga Talisaynon tungod kay daghan na sila og kapangitaan og trabaho. (/BDB)(BANAT NEWS)