CEBU, Philippines – Gawas sa petisyon sa pagpakanselar sa certificate of candidacy (COC) ni Kongresista Gwendolyn Garcia nga gipasaka ni Atty. Edgar Gica sa Commission on Elections, Bise Gobernador Agnes Magpale niduso sab og susamang petisyon.
Gitug-an ni Magpale nga niadtong Lunes, ang ilang kampo sa ikalimang distrito niduso sa maong petisyon batok ni Garcia. Giingong wala nagtug-an si Garcia sa iyang COC nga kombiktado siya sa kaso sa buhatan sa Ombudsman ug nga dili na siya makakupot og bisan unsang posisyon sa gobiyerno. Apan si Garcia nipasabot nga dili penal ang desisyon sanglit anaa pa kini sa Court of Appeals ug dili pa “final and executory”.
Si Garcia ug Magpale ang magsangka sa pagka-gobernador sa eleksiyon sunod tuig.
Ang manghud ni Garcia nga si kanhi kongresista Pablo John Garcia ang gipasakaan sab og susamang petisyon sa usa ka Gilbert Pepito.
Si Garcia ni-apply og transfer sa voter’s registration niadtong Hulyo 28, 2018 gikan sa Lungsod sa Dumanjug sa ikapitong distrito ngadto sa Lungsod sa Barili sa ikatulong distrito diin siya magpapili sa pagka-kongresista. Apan si Pablo John positibo nga dili molambo ang maong petisyon.
“Does the law require that one already be a registered voter at the time of filing of the COC for Congressman? No, the Constitution merely requires that a member of Congress be a registered voter of the district at the time of the election, or on 13 May 2019,” matud ni PJ Garcia.
Si Atty. Lionel Marco Castillano, provincial election supervisor, nagkanayon nga ang maong petisyon i-raffle kini kun asa nga Division sa Comelec dunggon ang kaso ug patubagon ang mga hingtungdan. Ang desisyon sa Division mahimong iapelar ngadto sa Comelec En Banc, ug kun dili na sab makauyon sa desisyon adto na sa Korte Suprema. -/GMR (BANAT NEWS)