CEBU, Philippines — Nisibaw ang taho nga naghinay-hinay sa pagpangabot ang mga kadudahang tawo sa kabukiran sa Dakbayan sa Talisay. Kini human adunay nabantayan ang katawhan nga bag-o sa ilang dagway nga namuyo sa dapit.
Gani si Chief Insp. Ardiolito Cabagnot, deputy chief sa Talisay City Police Station, wala molimod sa maong taho.
Siya niingon nga nakadungog siya sa maong report apan ila pa kining palapdan ang ilang intelligence monitoring. Iyang gipasabot nga klase-klase lang nga taho ang ilang nadawat pero wala nila kini gipakagamay ilabi na ang problema sa insurhensiya.
Si Cabagnot nagkanayon nga unta ang mga molupyo sa lugar motabang kanila pinaagi sa pagtawag gyud dayon kun adunay dili naandan nga panghitabo o mga tawo sa ilang lugar.
Sa nasayran, gideklarar sa kapolisan ang buwan sa Oktubre nga “Red October” diin ang buwan nga dili nila kakompiyansahan.
Dugang ni Cabagnot nga dili lang sa kabukiran ang ilang gi-monitor kung dili lakip ang mga bakwit gikan sa Marawi City. (BANAT NEWS)