Duha nailhan sa Kalunasan ambush

CEBU, Philippines — Natumbok na sa kapolisan ang duha sa upat ka suspek sa pagbanhig patay sa usa ka piniriso ug duha ka jail guards sa Kalunasan, Dakbayan sa Sugbo niadtong Septiyembre 13.

Kini sumala pa sa direktor sa Cebu City Police Office, Senior Supt. Royina Garma.

Nihangyo si Garma nga dili lang una ipagawas ang pangalan sa duha aron dili kini makasibat sa Sugbo.

Butyag ni Garma nga ang inmate nga si Jerryfer Perigrino gyud ang target sa duha ka mamumuno kinsa giingong mga hitman sa usa ka drug lord sa Sugbo.

Dugang pa niini nga nakabangi sa maong drug lord si Perigrino hinungdan nga gibanhigan ug nahimong collateral damage ang duha ka jail guards nga kuyog padulong sa hearing sa kaso sa ginadiling drugas.

Ang imbestigador sa maong kaso nga si Senior Police Officer 1 Winston Ybañez nagkanayon nga base sa nakalap nila nga impormasyon gikan sa usa ka saksi nga samtang nag-aginod ang service vehicle sa Cebu Provincial Detention and Rehabilitation Center, giingong gibabagan kini sa usa ka motorsiklo ug nikanaug ang backrider niini nga lalaki.

Gitirahan sa gunman ang duha ka jail guard kinsa si Joel Teves ang nagmaneho sa service vehicle samtang tupad si Bernie Bayotas.

Matud pa nga adunay ikaduhang motorsiklo sa luyo sa maong service vehicle diin nikanaug sab ang back rider niini ug gitirahan ang inmate nga si Perigrino.

Karong adlawa pormal na nga ipasaka ang kaso ngadto sa korte sigun pa ni Ybañez. (BANAT NEWS)