Biofence epektibo; kabarangayan gihangyo sa pagtabang

CEBU, Philippines — Moabot ngadto sa 26 ka toneladang basura ang nakuha sa Cebu City’s Department of Public Services sa kasapaan sa siyudad sulod sa usa ka buwan nga gibutang ang biofence sa tulo ka sapa.

Ang maong koleksyon sa basura nagpamatuod sa kahugaw na sa kasapaan ug waterways sa dakbayan sigon pa Cebu City Cebu City Environmental and Natural Resources Office head Ma. Nida     Cabrera.

“Nakita namo nga dako og natabang ang biofence sa paglimpyo sa atong kasapaan maong atong ipadayon sa barangay. CENRO’s planning to turn-over the biofence to the barangays next week,” matud ni Cabrera.

Ang biofence ginama sa gisumpay nga water bottles nga gisulod og pukot aron molutaw sa tubig ug mobabag sa mga basura.

Sa pagkakaron, gibutang na sa CCENRO ang biofence sa fishport sa Pasil ug Suba; sa Tinago Promenade; sa kabarangayan sa San Roque ug Tinago, ug sa sapa duol sa Tejero Barangay Hall.

“Unta ba, kinahanglan namo nga i-scale down sa barangays kay aron ma-sustain pud kay dili ra kaya sa CENRO.

Ang pag-maintain is ang sa barangay na unta ug ang community mo-take part pod by refraining from throwing garbage sa sapa,” matud ni Cabrera.

Kagahapon, nagtinabangay ang mga empleyado sa CENRO sa enhancement and beautification project sa three-meter easement zone sa Mahiga Creek sa Block 27 sa may North Reclamation Area.

Matud ni Cabrera nga naggamit og ecobricks ug eco-pavers ang CENRO alang sa maong proyekto.

Ang ecobricks ginama sa water bottles nga gibutangan og mga plastic sa sulod ug giporma og mga lingkoranan.

Ang eco-pavers ginama sa gibuak nga mga botelya ug gisagol sa semento aron mapakita nga mahimong mapuslan ang mga basura.

Gani, ilang paninduton sab ang Tinago Promenade ug ang waterways niini..

Dugang ni Cabrera nga ang Mahiga Creek ug Tinago Promenade ang duha sa i-showcase sa siyudad sa umaabot nga International River’s Summit sunod bulan. (/DILT)(BANATNEWS)