Libreng bus i-deploy atol sa kalag-kalag
CEBU, Philippines – Aron nga masiguro nga dili magnihit ang mga bus atol sa kalag kalag, ang mga lungsod sa habagatang bahin sa probinsya sa Sugbo mopadala og mga bus ngado sa Cebu South Bus Terminal (CSBT).
Matud ni Joy Tumulak ang manager sa CSBT nauyonan nila uban sa mga representante gikan sa mga lungsod sa habagatan lakip na ang mga traffic managers ug mga personnel sa Land Transportation Franchising and Regulatory Board (LTFRB), Land Transportation Office (LTO) ang maong lakang.
Dul-an 10 ka mga LGUs ang mopadala og tagsatagsa ka bus nga mag standby sa dalan sa V. Rama ug pasudlon sa terminal kon wala nay bus nga makahakot sa mga pasahero.
Ang makasakay sa bus mao ang mga konsituwente nga mouli sa ilang mga lungsod, pananglitan ang bus gikan sa Barili, ang makasakay ra niini mao ang taga Barili.
Dili usab mamahimo nga mohunong ug mokarga ug mopakanaog og pasahero ang bus kondili didto ra gyud sa maong lungsod. Ang nakanindot, libre kini.
Sugdan pag-deploy ang mga bus udto sa Oktubre 31 nga maoy gipaabot nga magsugod ang pagdagsa mga pasahero.
Ang presidente sa Cebu Provincial and Mini Bus Operators Cooperative Julie Flores miingon nga andam na sila sa maong okasyon ug siya mipasalig nga wala nay bus nila nga lapas og kinse ka tuig kay tanan brand new na.
Giawhag hinuon ni Flores ang mga sumasakay nga kon mahimo di na sila magpaabot sa Oktobre 31 ayha mamauli sa probinsya tungod kay siguro gyud nga malisod na ang pagsakay. (Rowena Capistrano/IBM)(BANAT NEWS)
- Latest
