CEBU, Philippines — Usa ang nakalas ug unom ang nangaangol human natagak ang ilang gisakyang truck sa ubos sa usa ka pangpang sa Sitio Dalawan, Barangay Catang, Lungsod sa Argao kagahapon sa alas-7 sa buntag.
Ang hepe sa Argao Police Station nga si Chief Inspector Jose Rovic Villarin miila sa nakalas nga si Ernesto Lapasan, 46, taga Barangay Talaga, sa maong lungsod.
Samtang ang naangol nga drayber mao si Wenceslao Mamugay Lesias, 49.
Matud ni Villarin nga sa inisyal nga imbestigasyon nasuta nga nagkarga og semento ang Isuzu truck nilang Lesias apan pag-abot sa maong lugar giingong nabuslot ang tuong ligid sa ilang truck.
Nawagtangan og kontrol si Lesias ug nalahos kini sa pangpang nga may gilawmong 30 ka metros.
“Posible niambak ni si Lapasaran. Wala man maunsa iyang mga kauban. Napilit ni siya sa kahoy sa Nangka napiyapi iyang nawong,” matud pa sa maong hepe.
Nakaangkon og mga minor injuries si Lesias ingun man ang lima ka mga kaubang pahinante.
Dugang niini nga andam moabaga sa mga gastohon sa tambalanan ang amo nilang Lesias. (BANAT NEWS)