Duha niduso og COC sa probinsiya

CEBU, Philippines — Nagmingaw pa ang mga lokal nga buhatan sa Commission on Elections sa unang adlaw sa pagsang-at sa certificate of candidacy kagahapon sa mga magpapili sa eleksiyon sunod tuig.

Sa Comelec-Cebu Province, si Bokal Victoria "Tata" Corominas-Toribio ang labing unang niduso sa iyang CoC sa pagpasubli sa katungdanan sa ikatulong distrito ug gisundan ni Konsehal Leo Dolino sa pagka-bokal gihapon sa samang distrito.

Silang duha pulos walay politikanhong partido.

"Mas feel nako mas maka-serve ko sa lain-lain (kung independente), dili man gyud makapareha atong baruganan," matud ni Toribio kinsa anaa pa sa unang termino.

Si Dolino ang anaa na sab sa katapusang termino isip konsehal sa Dakbayan sa Toledo.

Sila gikuyogan ni Toledo City Mayor John Henry Osmeña ug kaubanan.

Si Atty. Lionel Marco Castillano, Provincial Election Supervisor, niawhag sa mga molansar nga mas maayo nga sayo moduso sa ilang CoC aron nga kun adunay sayop, makorehian dayon.

Mingaw sab ang Comelec Cebu City North District diin mosang-at sa ilang CoC ang tanang mokandidato sa Dakbayan sa Sugbo.

Si Cebu City North District Election Officer, Atty. Marchel Sarno, nihangyo sa mga magpapili nga mas maayo mobisita una sa ilang buhatan aron matudloan kun unsa ang saktong buhaton sama sa pag-fill-up sa form ingon man sa mga kinahanglanon nila.

Gihangyo sab sa Comelec ang mga dumadapig nga anha lang sa gawas aron dili maghuot sa sulod. Gilauman sa Comelec nga modagsa ang mga mo-file sa ilang CoC sa katapusang duha ka adlaw.

Subay na sa filing sa CoC, nakigtagbo si Cebu City Police Office Director, Senior Supt. Royina Garma, kang Sarno alang sa mga polis nga ipakatap. Hinoon walay lugar sa Siyudad sa Sugbo nga gikonsiderar nga hot    spot.

“Maging mahinahon, kalmado, let us respect the rights of others also kung naa kay dili ganahan nga naay mo-file siguro lets just leave sa Comelec nalang kung ma-disqualify ba na o hindi,” ni Garma pa.

Gilangaw sab ang buhatan sa Comelec sa Siyudad sa Talisay sa unang adlaw sa pagduso sa CoC.

Si Atty. Gallardo Escobar, City Election Officer, nagkanayon nga ingon gyud niini ang mahitabo nga adto na moduso sa katapusang adlaw o depende sa ilang mga tuo-tuo nga adlaw nga swerte.

Ingon usab ang nahitabo sa buhatan sa Comelec sa Dakbayan sa Mandaue diin wala pay niduso sa ilang CoC sumala pa ni Atty. Fleur Ann Gujilde, ang City Election Officer. - Decemay P. Padilla, Gabriel C. Bonjoc ug Romeo T. Limpangog, GMR (BANAT NEWS)