CEBU, Philippines — Gihimakak sa Cebu Provincial Police Office ang nigawas nga report nga na–missing karon kadtong babayeng survivor sa Naga landslide nga niawhag kang Pres. Duterte nga ipahunong na sa hingpit ang quarrying sa ilang siyudad.
Ang giingong na-missing mao si Sheila Eballe.
Sumala pa sa tigpamaba sa CPPO nga si Supt. Janette Rafter nga ilang nasubay nga didto kini nipasilong sa balay sa paryente hinungdan nga wala na kini makita sa evacuation center.
“Naa mi nakaestorya nga family niya didto then naa ra si Eballe although wala siya sa evacuation center na,” si Rafter nagkanayon.
Dugang pa niya, walay mi-report sa estasyonan sa kapolisan sa Dakbayan sa Naga nga kini na-missing. Sukwahi kini sa nigawas nga balita sa online version sa usa ka pamantalaan (dili sa Banat News ug The Freeman) nga na-missing si Eballe. Ang maong balita gitangtang na nila sa internet. “Accordingly iyang husband and mga anak naa sa gawas. Siya na lang naa diri. Molargahay na sad na kay gipetisyonan na man daw na siya,” si Rafter nagkanayon.
Butyag ni Rafter nga andam sila nga motabang kon adunay nadawat nga mga pagpanghulga si Eballe sa iyang kinabuhi human maisugon kining nipadayag batok sa quarry operation sa Apo Cement.
Si Eballe nagpuyo sa Sitio Greyrocks, Barangay Pangdan, Dakbayan sa Naga ug giingong wala maapil sa natabunan sa landslide ang iyang panimalay apan naapil sa pugsanong gipabakwit kay nasulod sa usa ka kilometro duol sa landslide area ang ilang dapit. (BANAT NEWS)