CEBU, Philippines — Nagpakitabang ang pamilya sa Overseas Filipino Worker (OFW) sa Saudi Arabia human nga wala na kini nila makontak sukad sa niaging buwan.
Nisamot ang ilang kabalaka human ang laing OFW nga nagtrabaho ngadto sa Saudi Arabia nipadala og litrato sa mga suwat sa biktima nga nagpakitabang aron siya maluwas tungod kay giingong gitanggong kini sa pinuy-anan sa iyang amo unya bun-ogon.
Si Janeth Pestañas Siano nibutyag nga ang iyang maguwang nga si Euyen Siano Magbanua, 40-anyos nilarga ngadto sa Saudi niadtong Agosto 10 niining tuiga.
Upat ka adlaw ang nakalabay si Magbanua nitawag kanila nga buot kining mobalhin og trabaho tungod kay giingong gimaltrato siya sa iyang kasamtangang amo.
Human sa maong tawag hangtud karon wala na nasubli ang komunikasyon ni Magbanua ngadto sa iyang igsuon.
Base sa suwat ni Magbanua giimbargo ang iyang cellphone sa iyang amo hinungdan nga ang iyang gibuhat mao ang pagsuwat na lang diha sa papel ug iyang gilabay sa bintana sa pamasin nga mabasahan kini.
Ug nabasahan gyud kini sa laing Pinay nga OFW kinsa dili magpabutyag sa iyang pangalan.
Matag labay sa basura sa maong Pinay mapunitan niini ang suwat ni Magbanua nga dunay lakip sa mga numero sa cellphone sa bana ug anak niini.
Ang igsuon ni Magbanua naghinaot nga ang iyang igsuon matabangan unta kining makalingkawas sa iyang amo ug makapauli na.
Giingong ang pamilya ni Magbanua nisuway og kontak sa agency niini apan giingong ang maong agency dili motuo sa mao nilang sumbong sa nahitabo sa nahisgutang OFW.
Ang Banat News nisuway usab og kontak sa maong agency aron makuhaan og pamahayag apan walay motubag sa tawag. (BANAT NEWS)