Mga hinabang nag-abot-abot

CEBU, Philippines — Nagkalain-laing pundok ug indibidwal ang nihatud sa ilang hinabang alang sa mga nabiktima sa “killer landslide” sa Tinaan, Siyudad sa Naga.

Dili lang alang sa mga biktima ang mga hinabang kun dili lakip sab ang mga pagkaon, tubig ug uban pa alang sa mga rescuers.

Ang Barangay Tangke, Dakbayan sa Talisay nga pinangulohan ni Kapitan Nelson Cabanes nidawat og mga hinabang kay sila na ang mohatud niini ngadto sa Siyudad sa Naga.

Samtang si Jennelyn Geagonia, magtutudlo sa pangpublikong tunghaan, niingon nga dali sila nihimo og komunikasyon sa Talisay City College Alumni Association aron mohatag sab og ayuda.

Una niini, si Naga City Mayor Kristine Vannesa Chiong nagpasalamat sa tanang nitunol sa ilang tabang panahon nga sila nagkinahanglan.

Usa ka tinun-an sa Dakbayan sa Naga nga si Connie Secuya, kinsa busy sa pagbahig-bahig sa mga used clothing, nibutyag nga nagbangutan sila sa gidangatan sa ilang mga katagilungsod hinungdan nga nihimo siya sa pagtabang. Sumala pa ni Secuya nga niining panahona importante kaayo ang espiritu sa pagtinabangay ilabi na sama niya nga wala man siyay kwarta ug pagkaon nga ikahatag apan andam siya sa pagpaambit sa iyang kusog alang sa mas labi nga nanginahanglan.

Si Giovanni Leyco, gikan sa Micro International Institute of Technology nitug-an nga niining panahon sa katalagman importante kaayo ang mithi sa pagtinabangay ilabi na kadugo ra usab ang mga biktima isip mga Sugbuanon.

Dugang pa ni Leyco nga gawas sa pagboluntaryo aduna usab silay bitbit nga mga relief goods.

Ang mga sakop sa Cebu Federation of Beat Journalist atol sa pagtak-op sa Cebu Press Freedom Week nakatigum sab og gamay aron itabang sa mga biktima.

Kini isip kabahin sa Concert for a Cause sa mga maglilingaw sa Sugbo karong Sabado sa Guadalupe Gym diin tag P100 ang tiket.

Si Archbishop Jose Palma mapasalamaton sa tanang tawo nga nitabang bisan unsa nga mga pamaagi.

Lakip sa nipadangat sa ilang hinabang ang kapolisan sa Compostela Police Station nga gipangulohan sa ilang hepe nga si Senior Inspector Jade Sumugat.

Gitunol nila ang ilang mga pinutos nga hinabang ngadto sa Municipal Disaster Risk Reduction and Management Office nga mao na ang mohatud niini ngadto sa mga biktima kauban sa ubang donasyon.

Ang kagamhanan sa Dakbayan sa Mandaue pinaagi ni Mayor Gabriel Luis “Luigi” Quisumbing ang nipadayag na sa paghatag og pinansiyal nga hinabang alang sa mga biktima sa katalagman.

Giawhag na ni Quisumbing si Bise Mayor Carlo Fortuna sa pagpalabang og resolusyon nga maggahin og salapi gikan sa ilang calamity fund nga P200,000.

Unang gihimo ni Quisumbing ang pagpadala sa ilang 24 ka responders sa lugar kuyog sa duha ka ambulansiya, mga kahimanan sa search and rescue operation ug ingon man labing bag-o nga mobile kitchen alang sa pagtabang sa pag-andam sa pagkaon sa mga biktima ug mga rescuer. (BANAT NEWS)