Giabangan nga garbage truck gikwestiyon

CEBU, Philippines — Pipila ka konsehal sa Barug Team Rama-Partido Demokratiko Pilipino-Lakas ng Bayan ang nisaway sa kasamtangang administrasyon may labot sa pag-abang og heavy equipment.

Si Konsehal Pastor Alcover Jr., vocal critic ni Mayor Tomas Osmeña, nialegar nga dunay kahiwian ang pag-bidding sa rental sa heavy equipment.

Kini human nabantayan nga ang mga trucks sa Pasajero Motors Corporation, ang kanhi supplier sa siyudad, dunay susamang face value sa ekipo sa Geo Transport and Construction Inc., ang kasamtangang service provider.

“Klaro man kaayo nga murag gipapahuway lang ang Pamocor, gipapahuway ang ngalan kay tungod lagi napili man, na-ABC man si Franklyn,” matud ni Alcover.

Kahinumduman nga ang Pamocor nga gipanag-iya ni Association of Barangay Councils (ABC) president ug Kasambagan Barangay Kapitan Franklyn Ong dunay rental contract nga nagkantidad og P65-million sa siyudad gikan sa Enero hangtud Hunyo karong tuiga.

“Ang ngalan raman giilisan, ang equipment gigamit Pamocor raman gihapon,” sigun ni Alcover.

Si Konsehal Joel Garganera nidason sa obserbasyon ni Alcover ug sigun niini nga ang nakalahi lang kay ang Geo Transport nibutang sa ilang ngalan sa trucks.

Nunot niini, si Alcover niawhag sa Bids and Awards Committee (BAC) nga moduso sa kopya sa kontrata sa Geo Transport aron pagpapas sa pagduda.

Si Konsehal Raymond Alvin Garcia nga usa ka abogado niingon nga tan-awon nila ang bidding process alang sa posibleng legal action.

Niadtong Oktubre 2016, ang kagamhanan sa siyudad nagsugod sa pag-abang og trucks aron pagpalambo sa garbage collection.

Ang giabangang mga trucks magdagan 24-oras matag adlaw nga mangolekta og basura sa kabarangayan.

Apan ang pangulo sa BAC, Ronaldo Malacora, nagdumili sa pagkomentaryo sanglit tan-awon pa niya ang mga dokumento.

Gideklarar sa BAC ang Geo Transport isip winning bidder sa rental contract nga nagkantidad og P12-million alang karong buwana. (BANAT NEWS)