Patay dihadiha sila si Prison Guard 1 Joel Teves, Prison Guard 1 Bernie Bayotas ug ang priso nga si Jerryfer Perigrino.
File
2 prison guards, inmate gipatay
Rowena Capistrano (Banat) - September 14, 2018 - 12:00am

CEBU, Philippines – Susama og salida sa “Ang Probinsyano” ang paghulagway sa mga residente sa Oprra Unit 5, Barangay Kalunasan ning Dakbayan sa Sugbo ang pagbanhig sa sakyanan sa Cebu Provincial Detention and Rehabilitation Center nga niresulta sa kamatayon sa duha ka prison guards ug inmate nga mopadulong unta sa korte kagahapon sa buntag,

Patay dihadiha sila si Prison Guard 1 Joel Teves, Prison Guard 1 Bernie Bayotas ug ang priso nga si Jerryfer Perigrino.

Giingong upat ka mga lalaking pulos nag-angkasay sa duha ka motor ug nagtaptap sa ilang mga nawong ang mga namanhig.

Matud pa ni Chief Inspector Edward Sanchez, hepe sa Guadalupe Police Station giatangan nang daan ang mga biktima diha sa maong dapit gibanabanang 1.5 kilometro gikan sa CPDRC.

Dihang naigo ang driver nadasmag ang sakyanan sa usa ka gi-parking nga motorsiklo kilid sa usa ka balay.

Ang duha ka prison guards namatay diha gyud sa ilang gilingkoran samtang naghapa na sa luyo si Perigrino nga wala na say kinabuhi.

Kinsay target?

Dako ang pagtuo ni Sanchez, nga si Perigrino maoy target ilabi na usa kini sa mga drug lord apan wala usab nila gisalikway nga basin ang duha ka mga prison guards ang tuyo sa mga mamumuno.

Nakig-alayon karon si Sanchez kang Retired Chief Inspector Reynaldo Valmoria, CPDRC jail warden aron magpakisayod sa estado sa mga prison guards.

Dad-on unta si Perigrino sa korte kagahapon alang sa ipasakang kaso human kini nakuhaan og drugas sa random greyhound sa nilabay nga bulan.

Sa pikas bahin, si Gobernador Hilario Davide III mibutyag nga ang duha ka prison guards parehong gipanid-an tungod sa pagdudang aduna silay kalambigitan sa ilegal nga kalihokan sa maong prisohan.

Si Davide nagtoo nga dili gyud makalusot ang kontrabando sa CPDRC kon way nalambigit nga mga personnel sa prisohan.

Samtang si Valmoria nagkanayon nga ang duha ka napatay nga prison guards adunay giatubang nga reklamo diha sa Committee on Discipline and Investigation (CODI).

Gani naapil si Teves sa 12 ka mga personnel sa CPDRC nga gisuspenso og 30 ka adlaw sa niaging tuig tungod sa padayong pagsulod sa ilegal nga drugas sa maong prisohan.

Matud pa ni Valmoria, niadtong Miyerkules sa hapon gipahibalo sila nga gisaka na ngadto sa korte ang kaso ni Perigrino mahitungod sa mga nakuhang drugas sa iyang kubol niadtong bulan sa Agosto.

Apan tungod kay wa maapas ang pagproseso niini gipabalik ang inmate kagahapon sa buntag apan gibanhigan na kini.

Si Perigrino daan nang nag-atubang og kaso sa ilegal nga drugas human nadakpan sa lungsod sa Argao.

Niadtong 2016, si Perigrino nakuhaan og drug paraphernalia, sex toys, shabu ug uban pang kontrabando lakip na sa kwarta nga dili momenus P60, 440 atol sa greyhound operation nga gihimo sa CPDRC, pagkasunod tuig 2017, nakuhaan na usab siya og ilegal nga drugas sa iyang higdaanan.

Siya usab ang gitumbok nga tag-iya sa tulo ka manok igtatari sa sulod sa provincial jail kaniadto ug giingong ang pula nga sakyanan niini naka-park diha sulod sa CPDRC.

Karibal ni barok?

Si Valmoria nagkanayon nga atol sa ilang greyhound operation niadtong bulan sa Hulyo karong tuiga, si Perigrino nitug-an kaniya uban sa mga sakop sa Provincial Intelligence Branch (PIB) nga ang laing high profile inmate nga si Alvaro “Barok” Alvaro maoy nagpaluyo sa ilegal nga drugas sulod sa CPDRC.

“During our interrogation sa pagdakop namo ani niya, iya man gi-divulged nga si Barok na-involved , maoy usa sa nagpalusot sa una.. Mura ba na sila nag-away, naay sariling kuan ba,” matud ni Valmoria.

Wala gisalikway sa warden nga posibleng adunay koneksyon sa illegal drugs sulod sa prisohan ang pagpamanhig nga nahitabo.

CCTV napawong

Sa pagsubay sa Banat News sa Barangay Kalunasan, didto nasuta nga alas 2:43 sa kaadlawon dungan nga napalong ang CCTV cameras duol sa CPDRC ug sa may Haarlemmermeer Bridge .

Ang maong dalan lutsanan padung ug gikan sa CPDRC. Gikahibulongan usab nila sa barangay nga dungan ra usab kining nibalik og siga alas 9:37 sa buntag pipila ka minutos human sa pagpamanhig.

Sa iyang bahin, si Konsehal Dave Tumulak, Chairman sa Committee on Public Order and Safety sa Cebu City subling miawhag sa kapolisan nga pabutangan og polis ang rota gikan sa prisohan padung sa korte. Una nang mi-request niini si Tumulak human sa nahitabong pag-ambush patay sa tulo ka inmates sa Talisay City Jail sakay sa sakyanan sa prisohan samtang sila padung sa korte alang sa husay sa ilang mga kaso pipila ka buwan na ang milabay.              

Police escorts

Samtang si Cebu City Jail Warden Supt. Renante Rubio mipasalig nga mohatag sila og igong seguridad sa mga inmates ilabi na sa pagpadulong sa korte.

“Karon atong buhaton ana, atong dugangan atong security or kung naay mag-request maybe we could ask the city director to provide us escort sa police.

Sa pagkakaron di man ta dapat mahadlok gyud kay atong makita kada kanto naa may police nga nagbantay diri gani atbang sa atong gate naay outpost gibutang,” ni Rubio pa. (Le Phyllis Antojoado ug Decemay P. Padilla/IBM)(BANAT NEWS)

 

 

DEAD
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with