CEBU, Philippines — Batang giingong may sakit sa dugo gitabangan sa Malasakit Center sa Vicente Sotto Memorial Medical Center pinaagi ni Special Assistant to the President Christopher “Kuya Bong” Go. Ang 11 anyos nga batang taga Bohol nga si Jomel Montes giduaw ni Go diha sa Vicente Sotto Memorial Medical Center, Cebu City. Ang maong bata adunay sakit nga leukemia.
Sumala pa nga adunay mipahibalo sa buhatan ni Go bahin sa kahimtang sa bata ug wala silay kwartang ikapatambal niini hinungdan sa pag-aksyon sa Malasakit Center ug sa Office of the Presidential Assistant of the Visayas pinangulohan ni Sec. Michael Dino.
Si Montes gikuyogan sa amahan nga si Edgar Montes, inahan ug igsuon diha sa Vicente Sotto Memorial Center gikan sa Governor Celestino Gallares Memorial Tagbilaran sa Bohol pinaagi usab sa tabang ni Doctor Merio Rey B. Biboso kauban ang medical team niini sa Tagbilaran City Disaster Risk Reduction Management Office.
Ang amahan sa bata gipasaligan ni Go nga abagahon sa Malasakit Center ang galastohan sa tambal ug mga gikinahanglang pag-atiman sa anak niini diha sa VSMMC.
Human sa hamubo nga pakigtabi ni Go sa bata, mitunol kini og sobre alang sa personal niyang tabang kanila ug ingon man duha ka cellphones ug gipasaligan nga dili na sila angay mabalaka sa hospital bills.
Ang Malasakit Center may pundo nga P50 milyones kada buwan gisugdan kaniadto didto sa Davao ni Pres. Duterte ug ni Go gitinguha usab nga mapakatap sa tibuok nasud. Niadtong bulan sa Pebrero opisyal nga gibuksan ang Malasakit Center sa VSMMC ug nakaserbisyo na og kaliboang mga kabus nga pasyente sukad sa pagkatukod niini.
Nagsilbi kining one-stop shop alang niadtong nagkinahanglan og financial assistance para sa ilang balayrunon sa tambalanan. Giusa sa maong sentro ang mga ahensya sa gobiyerno nga mahimong makahatag og tabang sa mga nagkinahanglan.
Dinhi sa Kabisay-an, aduna nay tulo ka mga Malasakit Centers nga naa sa Tacloban City ug Ilo-Ilo City ug plano pa gyud kining ibutang sa uban pang mga rehiyon sa nasud.
Alang niadtong mga gustong motabang sa maong bata, mahimong kontakon ang pamilya niini pinaagi ni Jocelle Montes sa telepono 0975320143. (Ian B. Melecio, BN News Editor)