CEBU, Philippines – Ang mga opisyal sa Probinsiya sa Sugbo nihangyo sa publiko nga mosabot una sa posibleng epekto sa partial nga pagsirado sa runway sa Mactan Cebu International Airport (MCIA).
Ang tagdumala sa tugpahanan nipahibawo kini kabahin sa temporaryong pagsirado sa runway walo ka oras matag adlaw sulod sa duha ka semana sugod karong bulan sa Septiyembre alang sa himuon nga rehabilitasyon.
Si Gobernador Hilario Davide, III kinsa usa sa mga board of directors sa MCIAA nagkanayon nga kinahanglan kini aron mapauswag pa ang serbisyo sa tugpahanan hilabina nga operational na ang terminal 2 diin nahimutang ang mga international flight.
Si Bise Gobernador Agnes Magpale nagkanayon nga posibleng makaapekto o makalangay kini sa pagbiyahe sa mga pasahero apan kinahanglan usab ang rehabilitasyon aron masiguro nga luwas ang dagan sa mga eroplano sa maong tugpahanan.
Ang operator sa MCIA nagkanayon nga ilang konsultahon daan ang mga airline kalabot sa epekto sa himuong temporaryo nga pagpasirado aron nga maka-adjust kini sa mga flight sa airport. (/BDB)(BANAT NEWS)