CEBU, Philippines – Gusto ni Cebu City Mayor Tomas Osmeña nga ibalhin gawas sa Sugbo si Chief Inspector Chuck Barandog nga kasamtangang nadestino sa Criminal Investigation and Detection Group-7.
Matud ni Osmeña nga nagpadala na siya og suwat kang Cebu City Police Office director, Senior Supt. Royina Garma, labot sa iyang hangyo niadtong kini pa ang hepe sa CIDG-7. Si Barandog ang gidudahan ni Osmeña nga responsable sa pagpusil sa kanhi polis nga si Ahmed Lozano, konsehal kaniadto sa Barangay Calamba nga si Eldy Ygonia ug ang pagpangrakrak sa sakyanan ni Konsehal Richard Buscaino sa Calamba.
Ang giingong bati nga reputasyon ug kalihukan ni Barandog ang gibasehan ni Osmeña.
“I give the warning to Garma even before the barangay elections. Basta that’s what I hear, he’s my suspect, they have a list, I have a list,” matud ni Osmeña.
Si Barandog nagdumili sa pagluwat og pamahayag labot sa pasangil ni Osmeña samtang mangayo siya og tambag sa iyang abogado. (/GMR)(BANAT NEWS)