CEBU, Philippines – Makadawat og tag P10,000 nga bonus ang mga kawani sa Mandaue City Hall sa ika-49 ka tuig nga Charter Day karong Agosto 30. Mokabat sa P4 milyones ang gigahin sa kagamhanan sa siyudad nga gastohan alang sa kapin sa usa ka bulan nga kalihukan.
Sa niaging tuig, ang mga opisyal ug ang 643 ka regular nga mga kawani ang nakadawat sab og P10,000 nga Charter Day bonus.
Gikalipay sa mga kawani ang pag-aprobar sa konseho sa gigahin nga budget diin nalakip ang maong bonus.
Lakip sa kalihukan sa Charter Day ang State of the City Address ni Mayor Gabriel Luis Quisumbing sa Agosto 29 ug groundbreaking ceremony sa bag-o nga Mandaue City Government Center sa Agosto 30.
Ang government center anaa kini mahimutang sa karaang merkado publiko nga naguba sa linog niadtong Oktubre 15, 2013. (/GMR)(BANAT NEWS)