CEBU, Philippines — Lima ka mga gidudahang nalambigit sa ilegal nga drugas ang nangadakpan sa managlahing operasyon sa mga otoridad dinhi sa Sugbo.
Sa buy-bust operation nga gihimo sa Carbon Police Station, Sitio Ermita Proper, Barangay Ermita nasikop sila si Jaime Librado, 48, ug Teresa Cabahug, 62.
Ang Station Drug Enforcement Unit sa Carbon Police pinangulohan ni Police Senior Inspector John Kareen Escober, nipahigayon og buy-bust operation human may mitug-an kanila bahin sa operasyon sa duha. Nasakmit gikan kanila ang duha ka gagmay nga karton nga adunay dili mominos sa 37 ka mga gagmay nga putos sa gituohang shabu, buy-bust money ug gituohang halin nga mobalor og P600.
Samtang nadakpan ang giingong idlas nga drug pusher sa Sitio Tugas, Barangay Gun-ob, Dakbayan sa Lapu-Lapu kagahapon sa buntag human ang mismong mga silingan niini ang misumbong kanila.
Si Chief Inspector Jiame Tolentino sa City Intelligence Branch sa Lapu-Lapu City Police Office miila sa suspek nga mao si Kevin Rosello, 32.
Matud ni Tolentino idlas kaayo si Rosello ug makadaghan na kining nakaipsot kanila.
Dihang gitunol na sa suspetsado ang napulo ka gagmay nga paketeng shabu bugti sa P1,000 dali kini nilang gisignit. Nakuha usab ang dugang 26 ka gagmay nga paketeng shabu.
Sa Talisay City, duha ka mga mamumuo ang nadakpan human giingong namalit og ginadiling drugas sa Barangay Tanke niadtong Domingo sa buntag.
Ang mga dinakpan mao sila si Ramir Barangan, 28, usa ka factory worker nga taga Barangay Candulawan, lungsod sa Minglanilla ug ang 17 anyos nga giingong usa ka construction worker nga taga Barangay Tuyan, Siyudad sa Naga. Ang duha nadakpan sa checkpoint human nasuta nga way lisensya si Barangan ug sa pagrekisa nakuhaan ang menor de edad og 11 ka paketeng shabu. (BANAT NEWS)