Gihimong “drug den” ipasira, ipaguba

CEBU, Philippines — Pasirad-an na unya kadtong mga istruktura o establisamento nga napamatud-ang gigamit sa makaduha nga higayon o mas labaw pa alang sa pagpayuhot sa ginadiling drugas.

Ang maong laraw matuman kon maaprobahan ang una ug uwahing balaudnon nga gipasar ni Association of Barangay Councils Cebu City Chapter ug Tisa Barangay Captain Phillip Zafra.

Ang maong balaudnon naghuwat na lang sa pirma ni Mayor Tomas Osmeña.

Malaumon si Zafra nga aprobahan ni Osmeña ang mao niyang lakang nga nagtumong nga mas mahatagan og ngipon ang Republic Act 9165 o Comprehensive Dangerous Drugs Act of 2002.

Ang maong lakang usab nagtumong sa pag-umol sa City Dangerous Drugs Administrative Board nga maoy mosusi ug modeklara sa usa ka establisamento o istruktura nga usa ka public nuisance o nagdala og samok sa komunidad.

Sumala pa ni Zafra nga ang istruktura, balay o establisamento nga kaduha nang nasakpan nga gihimong lugar sa pagbaligya ug pag-deliver sa ginadiling drugas basi sa Section 52 sa RA 9165, ipadeklara nga public nuisance sa board.

Human masuta sa board nga tinuod ang pasangil, ideklarar niini nga public nuisance ang maong establisamento.

Kon madeklarar kini nga nagdala og samok sa publiko, ipasira sa dakbayan ang maong establisamento sulod sa usa ka tuig basi sa order nga ipakanaug sa board.

Adunay silot nga nagtangag ang maong ordinansahon nga P5 mil ug pagkapriso sulod sa unom ka tuig ngadto sa usa ka tuig nga ipahamtang ngadto sa tag-iya niini.

Dugang ni Zafra nga basi sa maong ordinansahon, gidili usab ang paggamit, pagpuyo, pagtugot nga lain ang mopuyo ug mogamit sa establisamento nga gideklarar na nga nuisance.

Lakip nga gilatid sa maong ordinansahon ang pagdili sa pagguba sa pahibalo, paglangkat o pag-usab sa order sa board nga gipapilit sa usa ka establisamento.

Matud ni Zafra nga hatagan og igong proseso pinaagi sa hearing, pagpadala og notisiya  ang malambigit nga istruktura o establisamento aron maimbistigahan una pa pahamtangan sa naasoy nga mga silot. (BANAT NEWS)