CEBU, Philippines — Patay ang usa ka lalaki human kini gikatahong napusilan sa mga polis kay nisukol kanila atol sa buy-bust operation nga gihimo sa Drug Enforcement Unit sa Parian Police Station diha sa Sitio Sampaguita, Barangay Tejero ning Dakbayan sa Sugbo. Ang operasyon gihimo pinangulohan ni Police Chief Inspector Kenneth Paul Albotra uban sa Philippine Drug Enforcement Agency niadtong Biyernes sa gabii ug miresulta sa kamatayon ni Gewe Gestopa, taga Dakbayan sa Mandaue.
Matud pa ni Albotra, nakabantay ang suspek nga polis ang nipalit kaniya og drugas ug nibunot kini sa iyang armas ug gipusil ang poseur buyer nga polis kaduha ka higayon apan wala makabuto ang armas niini hinungdan nabawsan kini sa iyang gipusil. Dugang pa ni Albotra, gidala sa tambalanan si Gestopa apan gideklarar kining patay na pag-abot didto. Nasakmit gikan sa napatay ang kalibre .38 nga adunay mga bala ug diha sa crime scene ang usa ka basiyo sa bala sa 9mm, mga pinutos nga gidudahang shabu ug ang buy-bust money.
Hangtod karon wala pay pamilya nga niduaw o nibisita sa punerarya diin gidala ang patay nga lawas sa namatay. (/IBM)(BANATNEWS)