Opisyales sa Ermita usa na lay nabilin

CEBU, Philippines – Gipasalig ni suspended Ermita Barangay Captain Mark Rizaldy Miral nga dili ra maapektuhan ang basic services sa ilang barangay human siya lakip na iyang  unom ka mga konsehal gisuspenso og usa ka tuig sa Office of the Ombudsman Visayas.

Kahinumduman sa milabay nga tuig ang Philippine Drug Enforcement Agency (PDEA)-7 mipasaka og kaso batok sa mga Barangay Officials sa Ermita kay giingong wala kini makig-alayon sa PDEA dihang nagpahigayon sila og anti-drug operation sa dapit.

Ang mga opisyales sa barangay niadtong tuiga nga gipangulohan ni kanhi kapitan Felicisimo “Imok” Rupinta gisuspenso og unom ka buwang preventive suspension.

Ug niadtong Huwebes ang Department of Interior and Local Government (DILG) Cebu City nga gipangulohan ni Acting Director Joy Calvo mi-serve sa suspension order isip silot kanila.

Gawas kang Miral, ang unom ka mga konsehal nga gisuspenso og usa ka tuig mao sila si Antonieto Flores, Ryan Jay Rosas, Alio Tamundo, Domingo Ando, Maria Buanghog ug Wilbert Flores.

Ang anti-graft office misilot kanila og suspension sulod sa usa ka tuig nga walay sweldo kay nakita nga sila administratively liable sa gross neglect of duty.

Ang anak ni Imok nga si Konsehal Efe Rupinta mao nalay nahibilin nga opisyal kay wala man siya’y labot sa nasilotan. Siya karon maoy acting barangay kapitan sa Ermita.

Dili na bag-o kang Rupinta ang pagka-opisyal sa barangay sanglit SK Chairman siya kaniadto sa dihang kapitan pa ang iyang amahan.

Siya miingon nga magpatambag ra siya sa mga suspendidong mga opisyales kon gikinahanglan. (/IBM)(BANAT NEWS)