Upat ka polis di pa “off the hook”
CEBU, Philippines — Ang direktor sa Cebu City Police Office nga si Senior Supt. Royina Garma nagkanayon nga bisan pa man og nagnegatibo sa paraffin test ang upat ka mga operatiba nga nalambigit sa operasyon didto sa Sitio Bato, Barangay Ermita nga miresulta sa kamatayon sa usa ka bata, wala kini nagpasabot nga limpyo sila.
Apan siya mipasabot nga kaning mga ingon niini nga imbestigasyon pinaagi sa siyensya pangsuporta lang sa ubang ebidensya ug mga pamahayag.
Matud pa nga desisyon sa kampo Crame ang pagrelibo sa upat ka mga nalambigit nga mga operatiba nga silang PO3 Raydel Sardual, PO2 Dennis Steve Estrada, PO1 Rey Van Dadula ug PO1 Wilbert Perez.
Gibalhin na sila karon sa Police Regional Office-7 alang sa debriefing ug samtang nagdagan sab ang imbestigasyon sa maong kaso. Si Blayden Skyler Abatayo ,4, anaa ra sulod sa ilang panimalay nagtuon sa iyang leksyon ang naigo sa saag nga bala samtang dunay operasyon ang mga sakop sa Carbon Police Station.
Matud pa nga gironda nila ang usa ka payag duol sa balay sa bata diin adunay giingong mga durugista. Apan adunay nahitabong komosyon ug may nagpabuto og armas nga diin ang bala nakaigo sa dughan sa bata nga gikamatay niini.
Pagtin-aw ni Garma nga beripikasyon lang ang gibuhat sa mga polis sa maong lugar ug dili buy-bust operation nga kinahanglan pa og pakig-alayon sa Philippine Drug Enforcement Agency 7. Pangangkon sa polis nga dili sila maoy nakapabuto kung dili ang upat ka mga gikatahapang durugista. Wala silay nadakpan bisan usa sa ilang dakpunon.
"We welcome the NBI. They can proceed with the investigation but if they coordinate with us we are open. Wala naman kaming itatago sa investigation," pamahayag sa maong direktor.
Padayag ni Garma nga ang nahitabo nagpakita lang nga maangin gihapon ka bisan pa man og wala ka nalambigit sa drugas kon duna kay silingan nga nalambigit sa illegal nga drugas apan walay nagpakabana.
Dugang niya nga karong semanahona sila magtagbo sa kapitan sa Barangay Ermita kabahin sa maong panghitabo. Usa sa iyang ipangutana kon nganong way barangay tanod nga miabag sa mga polis sa maong operasyon. Nangangkon si Garma nga gidumog sa mga residente ang mga polis hinungdan nga gidali-dali na lang nila og sulod sa usa ka pitsel ang P80 mil balor sa ni-repack nga shabu. (BANAT NEWS)
- Latest