CEBU, Philippines — Duha ka polis ug usa ka Non-Uniformed Personnel (NUP) sa Cebu Provincial Police Office (CPPO) ang nagpositibo sa confirmatory test sa paggamit og ilegal nga drugas matud pa ni Senior Superintendent Manuel Abrugena, direktor sa CPPO.
Si Abrugena miingon nga kabahin kini sa mas hugot nga internal cleansing sa Police Regional Office (PRO)- 7.
Ang maong mga polis ug NUP gibutang sa Personnel Holding and Accounting Unit (PHAU) samtang padayon nga gi-monitor ang ilang mga gimbuhaton sa gawas.
Si Abrugena miingon usab nga ilang gipadali ang summary dismissal proceedings sa maong mga polis para matangtang na kini sa serbisyo sa PNP.
“Kung mapatunayan na nagkasala then they should not stay even a minute in the PNP service,” si Abrugena miingon.
Si Abrugena miingon nga magpadayon kining mga surprise drug tests sa kapulisan. Sa unang quarter sa 2018, ang CPPO nakahimo na og drug test sa sobra sa katunga sa ilang mga tawo sa tibuok probinsiya.
Si Abrugena mipasalig nga tanan nilang madawat nga mga reklamo batok sa mga badlungong mga polis ila gyud kining aksyonan.
“Kapag may complaint ay immediately removed them at i- reassign sa other offices para hindi magkaroon ng anumang (hadlang) ang ongoing investigation and then mas pinapadali po natin ngayon ang paglalapat ng cases against them,” si Abrugena miingon.
Sa laing bahin, usa sa mga kawani sa Bureau of Jail Management and Penology kon BJMP-7 nagpositibo sa gihimong drug test sa ilang rehiyonal nga buhatan.
Ang 79 ka BJMP personnel uban ni Regional Director Chief Supt. Arnold Buenacosa ang gipaubos sa drug test.
Wa ibutyag kon asa nadestino ang nagpositibo apan nahibaw-an nga ang 79 gikan pa sa Probinsya sa Sugbo, Siquijor, Cebu City, Mandaue City, ug Bohol.
Paabuton pa ang resulta sa confirmatory test. Kon makompirmar kini kasong administratiba ug posible nga mataktak sa serbisyo ang maong jailguard. (Rowena Capistrano/IBM)(BANATNEWS)