CCTV sa SRP makatabang sa kapolisan

CEBU, Philippines — Dakong tabang ang Closed-Circuit Television (CCTV) camera nga imontar diha sa South Coastal Road nga habig sa Dakbayan sa Talisay.

Si Superintendent Marlu Conag, hepe sa kapolisan sa Dakbayan sa Talisay, miingon nga adunay mga krimen, o disgrasya nga naglakip sa hit and run, nga dugay gyud masulbad kay wa’y bisan usa nga mobarug nga testigos sa panghitabo.

Iyang gibutyag nga kon ang mga panghitabo, o disgrasya bisan kon walay tawo nga nakasaksi, hayan makatabang gyud sa pagsunod sa imbestigasyon kon may makuha nga footage sa CCTV.

Sa miaging mga semana, usa ka lalaki ang nadisgrasya nga gipasagdan lang sa tawo nga nakadasmag niini.

Apan si Conag niingon nga lisud sa ilang bahin sa pagpangita sa responsable, kay lagi, mingaw ang lugar niadtong tungora ug walay nakatimaan sa plaka sa sakyanan.

Bag-o lang namontar ang traffic light diha eskina sa Carmen Village apan walay CCTV nga namontar. Matud ni Conag nga nindot gyud unta nga ma-upgrade ang monitoring aron paspas pud ang ilang pagresponde sa mga krimen.

Ubay-ubay na ang disgrasya sa SRP, ingon man apil kini sa mga dapit nga daghang mag-estambay nga mga batan-on, ilabi na ang mosalmot sa drag racing nga ang mga polis ra usab ang ilang bantayan. (/RUB)(BANATNEWS)