Nanghakop og dughan, namaak og ngabil
CEBU, Philippines – Gipasakaan og kaso sa 21 anyos nga babaye ang barangay clerk sa Dumlog, dakbayan sa Talisay tungod sa pagbinastos kaniya diha sud sa barangay hall niadtong Hunyo 14 sa alas 8 sa buntag.
Ang gikiha mao si Mark Anthony Gabornes, 33, nga giingong clerk sa barangay.
Ang babaye bag-o pang nanganak nitug-an sa Banat News nga mikuha siya og barangay clearance para sa live birth sa anak, apan sa iyang pagkanaog sa hagdan kalit siyang gigakos sa suspek ug gihakop ang iyang dughan.
Sa kapungot sa babaye gisagpa niya kini apan gikuptan man hinuon sa suspek ang iyang nawong ug gihagkan ug gipaak iyang ngabil. Tungod sa pagkisikisi nakabuhi ang reklamante ug mipauli.
Gusto lang unta niyang magpakahilom aron dili modako ang gubot apan wala siya nakaagwanta maong nisumbong siya sa mga polis niadtong Hunyo 18.
Kaso nga acts of lasciviousness ang giduso nila sa piskaliya. Si Gabornes nga gikuhaan og pamahayag mihimakak sa pasangil.
Matud niya sa nawong ra siya mihikap kay adtong higayuna naghamag-hamag man sila kay suod sila nga higala. (/IBM)
- Latest