Kagawad nga nakapusil gitagoan sa kapitan?

CEBU, Philippines — Si Cebu City Mayor Tomas Osmeña giingong nagtuo nga gitagoan ni Babag Barangay Captain Cesar Dolorito ang iyang konsehal nga si Renante Bacarisas kinsa gipangita  karon sa kapolisan human namusil og usa ka mangihaway og baboy.

Giingong sa wala pa mahitabo ang maong insidente dugay na nga wala giila sa mayor si Dolorito nga sakop sa Bando Osmeña Pundok Kauswagan (BOPK) tungod kay wala siya nakauyon niini.

Ang mayor mipadayag nga andam siyang mohatag og legal assistance ni George Ibona kinsa maoy biktima sa pagpamusil.

Si Dolorito sa iyang bahin, nagkanayon nga katungod ni Osmeña nga mosulti niini tungod kay ang konsehal iyahang bayaw ug first councilor usab sa ilang barangay ug dili usab malikayan nga dunay magtuo nga gitagoan niya ang suspetsado.

Apan giklaro ni Dolorito nga lakip siya nakurat sa hitabo ug gani nanawag dayon siya sa Mabolo Police Station ug ilang gisusi ang tanang lugar nga pweding tagoan ni Bacarisas.

Gihimakak sa kapitan ang pasangil ni Osmeña ug matud niini miapil siya og pangita sa suspetsado aron masulbad ang maong problema sa maong konsehal sa ilang barangay.

Sa laing bahin, disididong mopasaka og kasong frustrated murder ang asawa ni Ibona batok kang Bacarisas.

Kini ang gipadayag sa hepe sa Mabolo Police station nga si Police Senior Inspector Dindo Juanito Alaras.

Kahinumduman nga sa wala pa mahitabo ang insidente si Ibona nagsakay sa iyang multicab ug gipusil sa suspetsado kinsa niadtong higayona nagsakay og motorsiklo diha dapit sa barangay hall sa ilang lugar.

Giingong si Bacarisas kinsa miduol sa biktima nangutana nga “unsa man tiwason ta ni bay?”, dayon pusil ngadto sa biktima. Si Ibona nakaangkon og samad pinusilan sa iyang liog ug bukton. (BANAT NEWS)