Patay na, kasohan pa gihapon
CEBU, Philippines — Bisan og namatay na, pasakaan gihapon og kasong kriminal ang napatay’ng polis atol sa buy bust operation nga si Police Senior Inspector Raymond Hortezuela matud pa sa opisyal sa Police Regional Office-7.
Si Police Regional Office 7 director Chief Supt. Debold Sinas miingon bisan patay na ilaha gihapong isang-at ang kaso batok sa maong polis ug ang piskal na maoy modesisyon. Bugtong dili nila mahimo mao ang pagpasaka og kasong administratiba batok ni Hortezuela.
"Mao nay policy namo nga bisan og police encounter, i-file gihapon ang kaso bahala na ang piskal. The fiscal will declare kung naa ba gyud sa balaod o legitimate operation ba to," si Sinas miingon.
Bukas usab si Sinas sa plano sa Commission on Human Rights Region 7 nga mopahigayon og imbestigasyon kabahin sa pagkamatay ni Hortezuela.
Gibarogan niya nga lehitimo kadto nga buy bust operation batok kang Hortezuela apan miresulta sa shootout kay misukol kini sa mga operatiba sa Counter Intelligence Task Force Special Group Visayas (CITF SG) inabagan sa PRO-7.
Sa laing bahin, si Sinas mipasabot nga way madawat nga benepisyo gawas lamang sa gamay nga kantidad gikan sa accumulated approved leave ang madawat sa pamilya ni Hortezuela.
"Hinumduman ninyo, absolute gyud na siya. Wala tay kanang 'maluoy-luoy' para mahibaw-an sa atong mga polis nga kung di mo mangundang, mag-suffer inyong pamilya di ba?" matud pa sa maong heneral.
Iyaha hinuong gisabot ang pamahayag sa pamilya ni Hortezuela nga nisaway sa gibuhat sa kapolisan. Matud ni Sinas nasubo sila sa nahitabo sa kauban nilang polis. (/IBM)(BANATNEWS)
- Latest
