CEBU, Philippines — Human sa dul-an duha ka buwan nga walay operational weighing bridge alang sa garbage hauling, ang kagamhanan sa Siyudad sa Sugbo nakakuha na og bag-o.
Ang P2.5-million nga kantidad sa weighing bridge hingpit na nga nainstalar sa service area sa kontrobersiyal nga Inayawan Landfill.
Si Konsehal Eugenio Gabuya Jr., chairman sa committee on public services, niingon nga niadtong Marso ang Albatech, supplier sa weighing bridge nga nagbase sa Dakbayan sa Mandaue, nagsugod sa pag-instalar sa maong ekipo.
Sigun ni Gabuya nga ang ekipo opisyal nga mag-function human sa calibration process karong Miyerkules.
Mahitabo ang turn over ceremony karong Hunyo 15, adlaw’ng Biyernes.
Si Executive Assistant to the Mayor for Special Projects Randy Navarro niingon nga ang capacity sa bag-ong weighing scale moabot sa 60 tonnage nga mas labaw og 30 tonnage sa naguba na.
Magamit sa siyudad ang bag-ong weighing bridge aron masusi kon pila ka tonelada sa basura ang ma-dispose sa private-owned landfill sa Lungsod sa Consolacion.
Tungod sa naguba nga weighing scale, ang siyudad, nag-assign og duha ka City Hall workers aron pag-monitor kon unsaon sa private-owned landfill pagtimbang ang basura. Nigamit sab sa weighing bridge sa Department of Public Works and Highways sa Lungsod sa Minglanilla. -/GMR (BANAT NEWS)