CEBU, Philippines — Gitinguha ni Mayor Luigi Quisumbing ang pag-umol og special task force paghimo og mga pagtuon sa rehabilitasiyon sa Umapad Dumpsite base sa resulta sa pakisusi sa Japan International Cooperation Agency (JICA).
Si Quisumbing miingon nga tumong sa task force nga makakita og dinalian nga paagi paghabwa sa mga highly-combustible gas sama sa methane gas nga naa sa dumping area.
“This is a very important initiative because of the studies sa Jica. If not handled properly and with expertise, it can pose danger not just to the surrounding area but also imposes greater danger to an ever-expanding area,” matud pa ni Quisumbing.
Ang maong task force pangulohan kini sa kanhi pangulo sa Human Resource and Development Office nga si Damaso Tumulak ug pagaabagan usab kini ni Engr. Andres Suson nga kanhi sakop sa Office of the Building Official.
Matud pa ni Quisumbing nga gikinahanglan ang task force kay dili kini maapupa og trabaho sa Department of General Services.
Ang dakbayan migahin og P120 milyones alang sa kaugmaran sa material recovery facility diha sa dumping area apan dihang nadiskubrehan ang methane gas deposit gi-realign ang pundo sa laing proyekto. (/IBM)(BANATNEWS)