CEBU, Philippines — Usa ka nag-awol nga sakop sa Armed Forces of the Philippines ang nadakpan human gikatahong naaktohang nanuyop uban sa laing duha ka mga higala didto sa sitio Central, barangay Luz niadtong Huwebes sa kaadlawon.
Ang mga dinakpan giila sa Mabolo Police Station mao si Corporal Arnold Rodriguez, 38, taga Sitio Upper Calvary Hills, barangay Apas ug ang managsuong sila Joel ,45, ug Rey Bahian, 50, nagpuyo sa barangay Luz. Sigun pa sa usa sa mga midakop nila nga si PO1 Isidro Rosaldo naaktohan nila nga nagrolyo og foil si Rodriguez samtang naghupot og nagkadaiyang paraphernalia ang duha ka mga Bahian. Nakuha gikan ni Rodriguez ang duha ka mga pakete sa gidudahang shabu ug mga drug paraphernalia samtang mga paraphernalia lang ang gihuptan sa mga Bahian.
Ang hepe sa Station 4 nga si Chief Insp. Clark Arriola mibutyag sa Banat News nga wala sa ilang listahan ang tulo.
Siya midugang nga si Rodriguez adunay warrant of arrest sa kasong Malversation of Public Property gikan sa sala ni Judge Silvestre Orejana Jr. sa Regional Trial Court Lanao Del Norte 12th Judicial Region, Branch 5, Iligan City. Ang tigpamaba sa AFP-Central Command nga si Col. Medel Aguilar miingon sa Banat News nga wala na sa ilang listahan si Rodriguez ug giingong maayo nga nadakpan kini. IBM (BANAT NEWS)