16-anyos nga nasunogan sa Pasil nakuhaan og drugas
CEBU, Philippines — Usa ka 16 anyos nga lalaki nga apil sa mga nasunogan sa Pasil, Cebu City sayo ning tuiga nga gihimong drug courier sa sindikato sa drugas ang naluwas sa kapolisan sa milabay’ng gabii diha sa Sitio Lawis sa maong barangay.
Matud pa ni Chief Inspector Allan Rosario sa Police Station 6 naagian ang maong batan-on sa nagpatrolyang mga polis nga nagdala og upat ka medium sized packs ug 45 ka small sized nga mga paketeng gituohang shabu.
Ang mga nakuhang gituohang shabu moabot P236 mil.
Sigun pa ni PO1 Jerlie Diaz, tigpamaba sa Women’s Desk sa Police Station 6 nag-inusarang nagpuyo sa gitukod pagbalik nga balay ang maong batan-on kay ang inahan niini ug apohan namalhin na og puyo sa Banawa.
Ang inahan miingon nga panagsa ra niini mabisita ang anak kay nasakit man ang apohan niini.Nahunong kini pagtungha tungod sa ilang kalisod apan karon untang abli sa klase mobalik kini sa pagtungha.
Ang batan-on gikatakdang i-turnover ngadto sa Department of Social Welfare and Development (DSWD).
Sa laing bahin, tulo ang nadakpan sa managlahing drug bust sa Lapu-Lapu City ug Carmen. Ang nadakpan sa Lapu-Lapu giilang si Jovanie Pahugot, 39, nga nakuhaan og 50 ka paketeng shabu.
Samtang nadakpan sab didto sa Carmen silang Anthony Devinagracia Singson, 22, ug Fernando Abayon Espanueva, 27, sa managlahing operasyon ug nasakmitan og ginadiling drugas. Romeo Limpangog, ug Pegeen Maisie M. Sararaña, CNU Intern/IBM (BANAT NEWS)
- Latest
