Duha ka barangay sa Asturias giatake og tungro

CEBU, Philippines — Gipaubos karon sa state of calamity ang duha ka barangay sa lungsod sa Asturias human maapektohan ang ilang kahumayan og rice tungro virus.

Ang Sangguniang Bayan sa lungsod sa Asturias nipasar og resolusyon niadtong Mayo 9 pagdeklarar og state of calamity sa barangay Bago ug Lunas nga parehong rice producing barangays sa lungsod.

Ang Rice Tungro Disease  usa sa sakit nga makadaot sa humay sa Asya. “Plants affected by RTD, show stunted growth, yellow to orange leaf discoloration, and few reproductive tillers,” sumala pa sa resolution nga gipasar sa SB sa Asturias.

Ang hinungdan sa RTD mao ang rice tungro bacilliform virus (RTBV) ug rice tungro spherical virus nga madala sa usa ka klase sa dulon nga gitawag og “green leafhoppers.”

Base sa assessment sa Municipal Agriculturist sa Asturias nga si Jade Mesias moabot sa 66 ka mga mag-uuma ang apektado niini, 45 ka mag-uuma sa barangay Lunas, samtang 21 usab ang barangay Bago.

Matod ni Mayor Jose Antonio Pintor, nga unom na ka bulan nga gaantos ang mga mag-uuma tungod kay wala nay klaro nga ani sa humay.

“Kay ang sistema diri naay mananom, naay mag-harvest ba, puli-puli, mao nga kining sakit balhin balhin,” matud ni Pintor.

Gisugyot karon nga dunganon ang pagtanom aron dungan sab pag-ani ug pagkahuman sunogon ang mga uhay.

Gisusi na sa Provincial Agriculture’s Office ug Provincial Disaster Risk Reduction and Management Office (PDRRMO) ang apektadong mga barangay. IBM (BANAT NEWS)

 

Show comments