CEBU, Philippines — Ang grupo ni Mayor Tomas Osmeña sa Bando Osmeña Pundok Kauswagan (BOPK) posibleng mokuha og kaalyado nga morepresentar sa mga Person with Disability (PWD) diha sa konseho karong umaabot eleksiyon sa tuig 2019.
Si Morishka Nicole Uy, 24-anyos kinsa usa ka magtutudlo sa Don Vicente Rama Memorial Elementary School ang posibleng iapil sa grupo sa BOPK human kini mipadala og makadasig nga suwat ngadto sa mayor kabahin sa nadawat niya’ng tabang gikan sa gobiyerno human sa nahitabong aksidente kaniya niadtong buwan sa Hulyo, tuig 2017.
Gisaysay ni Uy nga niadtong higayona paingon siya nga motambong og seminar dihang nabangga ang iyang gisakyan nga nagsubay sa South Road Property (SRP) ug ang iyang tuong paa naligsan kini sa bus ug kinahanglan nga putlon.
Si Osmeña sa iyang bahin, nagkanayon nga ang sama ni Uy ang iyang gipangita kinsa makasabot sa mga panginahanglanon sa katawhan ug isip magtudtudlo sa publikong eskwelahan makahibawo usab si Uy sa panginahanglanon sa kabataan ug edukasyon.
Matud sa mayor nga ang sama ni Uy maoy mga angayang mahimong umaabot nga lider.
Si Uy mipadayag kini sa iyang kahinangop nga mahatagan unya siya og kahigayonan nga mahimong representante sa mga PWD ug mapadayag na unya niya ngadto sa mga tawo nga bisan sa ilang kahimtang duna usab sila’y mga abilidad nga makatabang sa katilingban.
Niadtong milabay’ng buwan sa Enero si Uy mibalik na kini sa iyang serbisyo isip magtutudlo ug bisan sa iyang kahimtang karon nakahatag siya og inspirasyon ngadto sa kabataan. (Katrina Aguirre, CNU Intern/BDB) (BANAT NEWS)