CEBU, Philippines — Nisaad ngadto kang Gobernador Hilario Davide, III ang developer sa Alegria Oil Field nga motuman kini sa balaod sa pagprotekta sa kalikupan sa maong lungsod sa padayon niini nga pag-extract ug pag-produce og lana.
Si Davide mibutyag nga tulo ka semana na ang milabay nibisita kaniya ang mga opisyal sa China International Mining Petroleum (CIMP) kinsa maoy developer sa nahisgutang proyekto ug misaad kini kaniya nga magpadayon ang ilang operasyon nga subay sa balaod sa Pilipinas.
Ang maong oil field anaa kini nahimutang sa Barangay Montpelier nga usa ka bukirang barangay sa lungsod sa Alegria.
Ang makuha nga lana sa maong dapit gideklarar sa Department of Energy (DOE) nga commercially viable. Gilauman nga dako ang epekto niini sa ekonomiya dili lang sa Barangay Montpelier ug lungsod sa Alegria apil na usab niini ang tibuok lalawigan.
Gani 14 porsiyento nga makuha gikan sa kita sa maong development maadto sa panudlanan sa barangay, 18 porsiyento sa lungsod ug walo ka porsiyento sa probinsiya sa Sugbo.
Si Davide nagkanayon nga kon makuha na sa probinsiya ang bahin igahin kini sa mga proyekto sa lalawigan sa Sugbo.
Samtang si Mayor Verna Magallon sa Alegria nagkanayon nga ilaha usab nga igahin ang ilahang bahin sa ilahang basic services, livelihood programs ug ingon man sa water system sa lungsod. (BANAT NEWS)