25 balay naugdaw sa Lorega

CEBU, Philippines — Naugdaw gyud ang 25 ka balay samtang laing unom ang nakan-an sa kayo nga niulbo  sa Sitio Riverside, Lorega, Dakbayan sa Sugbo kagahapon sa buntag.

Matud ni Fire Chief Inspector Noel Nelson Ababon nga wala pa nasuta ang hinungdan sa sunog nga nagsugod sa balay ni Zosima Albarado diin naugdaw ang duha ka andana.

"Base sa pag-interview sa atoang mga investigators didto sa tag-iya gyud sa balay, naa man guy naka-witness nga bahin sa electrical, murag naay ni-spark," sigun ni Ababon.

Nadawat sa kabomberohan ang alarma alas 10:15 ug hingpit nga nakontrolar alas 10:39 sa buntag.

Walay kinabuhi nga nakalas sa maong sunog apan adunay usa nga napaso ang nawong.

Mokabat sa P350 mil ang gibana-banang danyos sa maong sunog.

Giawhag ni Ababon ang katawhan nga magmatngon sa mga electrical appliances ug sa mga kitchen appliances tungod kasagaran sa sunog, electrical appliances ang hinungdan.

Si Cebu City Mayor Tomas Osmeña niingon nga pareho lang gihapon sa mga niaging sunog ang proseso sa paghatag og hinabang sa mga biktima.

Ang pangulo sa Department of Social Welfare and Services (DSWS) nga si Lea Japson niingon nga anaa sa 73 ka pamilya ang apektado diin adunay 327 ka indibidwal apan ila pa kining i-validate karong adlawa.

Hatagan nila og pack meals sulod sa tulo ka adlaw ang mga biktima samtang andamon pa ang hinabang pinansiyal sa kagamhanan sa siyudad.

Ang mga biktima kasamtangang gipapuyo sa luna sa Department of Education sa may New Imus Road. - Jessa V. Caumeran, CNU Intern (BANAT NEWS)