Kapolisan di moadto sa balay ni Loot
CEBU, Philippines — Walay pulos kung dawaton sa kapolisan ang imbitasyon ni Daanbantayan Mayor Vicente Loot nga susihon ang ilang panimalay kung tinuod ba nga adunay kwarto nga puno sa drugas base sa pamahayag ni Presidente Rodrigo Duterte.
"Primarily siyempre kung ikaw ay mag-oopen ng house mo for us to visit there, would you think we would find anything? Siyempre wala," matud sa direktor sa Police Regional Office-7 nga si Chief Supt. Robert Quenery.
Si Loot nipadayag nga abli siya nga magpahigayon og inspeksyon ang Philippine Drug Enforcement Agency-7 ug kapolisan sa iyang panimalay.
"We will not go there for compliance lang na mag-inspect sa bahay niya, but basically it's still an aftermath of a more deeper intelligence gathering than just simply walking around his house," sigun pa ni Quenery.
Gipasabot ni Quenery nga sa kaso ni Loot gikinahanglan ang makuting pagsusi sa mas labaw pa niya sa pwesto.
"May mechanism naman dyan, adjudication or validation of such information will require a higher level. Wala sa level ko," pasabot sa heneral.
Si Loot usa ka retiradong heneral ug karon mayor na sa Lungsod sa Daanbantayan.
Usa siya sa mga gipanganlan ni Duterte niadtong 2016 nga “narco-generals” human kini nakadawat og taho nga nalambigit kini sa illegal drug trade.
Niadtong Mayo 13, usa ka adlaw sa wala pa ang piniliay sa Barangay ug Sangguniang Kabataan, girakrakan sa duha ka wala pa mailhing armadong lalaki gamit ang mga M16 nga armas ang bangka diin sakay ang mayor ug tibuok pamilya niini sa ilang pagdunggo sa pantalan sa Maya gikan sa Isla sa Malapascua. (BANAT NEWS)
- Latest