NBI nitabang pagsusi sa Loot ambush
CEBU, Philippines – Tulo ka anggulo ang gitan-aw sa National Bureau of Investigation (NBI-7) sa suway nga pagbanhig sa pamilya ni Daanbantayan Mayor Vicente Loot niadtong Mayo 13 diha sa New Maya Port sa maong lungsod.
Ang NBI-7 mihimo og parallel investigation sa nahitabo matud pa ni Patricio Bernales Jr. subay sa mando sa kaulohan.
Si Bernales nagkanayon nga ilang gitan-aw ang trabaho ni Loot isip mayor, iyang trabaho kaniadto isip heneral sa kapulisan ug ang personal nga motibo.
Sa pikas bahin, adunay gisubay nga persons of interest ang Special Investigation Task Group Maya sa kapolisan matud pa sa bag-ong direktor sa Cebu Provincial Police Office nga si Senior Supt. Manuel Javier Abrugena.
Sa press conference kagahapon siya mibutyag nga si Loot maoy mihatag kanila og mga posibleng rason likod sa maong pagpangrakrak.
Si Loot, usa ka retiradong heneral sa PNP ug karon mayor na sa Daanbantayan, ang usa sa mga gipanganlan ni Presidente Rodrigo Duterte niadtong 2016 nga ‘Narco Generals’ apan gihimakak kini sa mayor ug matud pa niya na-clear na siya niini.
Gikwestyon karon sa publiko kun nganong nakalusot ang maong mga armas kon gipahugtan pa ang checkpoint sa kapolisan sa maong lungsod nunot sa eleksyon.
“Ang kapolisan, we are covered only sa plain view doctrine. Ang pwede naming hulihin or confiscate or reasons to affect arrest ay kapag nakita naming na nandyan, nakalantad sa amin ‘yung any contraband, other than that di na po kami pwedeng magsaliksik or search without A1 info na nadu’n talaga ang mga paraphernalia,” si Abrugena mihatag og katin-awan. (Camille Pateres/IBM)(BANAT NEWS)
- Latest
