NBI satellite office sa Mambaling abli na

CEBU, Philippines – Pormal nga gibuksan sugod kagahapon ang bag-ong satellite office sa National Bureau of Investigation (NBI) diha sa Shopwise Mall sa Barangay Mambaling aron nga dili na maghuot ang mo-request og NBI clearance sa opisina sa NBI.

Si NBI Director Dante Gierran mituyo gyud sa pag-anhi sa Sugbo kagahapon aron pagtambong sa simple kaayong seremonyas. Matud ni Gierran nga ang NBI satellite office nila sa Mambaling maoy ika-116 nga satellite office nga gi-operate nila sa tibuok nasud.

Matud ni Gierran nga programa ni Presidente Duterte nga magbutang og daghang satellite office, ilabi na sa mga mall, kay aron nga makaalagad sila sa katawhan nga molukat og NBI clearance sa tumang kasayon.

Si Richard Cabucos, usa sa mga incorporators sa bag-ong NBI satellite office, miingon nga dali ra kaayong makuha ang NBI clearance sa mga molukat, gawas lang kon “ma-hit” ang ilang ngalan ug dunay susama kanila og ngalan nga may record.

Si Gierran miingon nga sa umaabot nga mga buwan, buksan na usab nila ang susama nga satellite office sa labing dako nga mall diha sa north reclamation area sa dakbayan sa Sugbo. (RUB)(BANAT NEWS)