6,000 kilos basura naugkat
CEBU, Philippines — Dul-an sa 6,000 kilos nga basura ang nakolekta sa kapin 700 ka tawo gikan sa mga local government units, pribadong sektor, academe, national government agencies ug uban pang stakeholders nga nangapil sa gipahigayong Earth Day Clean-up sa Lower Calajoan ug Tungkil, Minglanilla kagahapon sa buntag.
Ang kalihukan gipasiugdahan sa Department of Environment and Natural Resources-7 pinaagi sa Community Environment and Natural Resources Office.
Kini subay sa pagsaulog sa Earth Day 2018 nga adunay tema nga “Green the Cities, Green the Oceans-End Plastic Pollution”.
Base sa report sa CENRO Cebu City, kadaghanan sa mga basura nga nakolekta mga plastik, ilabi na ang shampoo sachet, straw, plastic bag ug diaper nga dugay madugta.
Gawas sa maong kalihukan sa Minglanilla, ang mga mangrove planting ug clean-up gihimo usab sa walo pa ka lugar sa Central Visayas sama sa Taloot, Argao; Danao, Panglao Island, Bohol; Cogon Norte, Loon, Bohol; Guindacpan, Talibon, Bohol; San Pedro, Talibon, Bohol; Luka, Tanjay, Negros Oriental; Calag-calag, Ayungon, Negros Oriental, ug Maite, San Juan, Siquijor. - Niña Mae P. Salvacion/CNU Intern (BANAT NEWS)
- Latest
